Noyabrın 3-də Azərbaycan Dillər Universitetinin (ADU) İnformasiya Texnologiyaları kafedrası və Beynəlxalq münasibətlər və regionşünaslıq (BMR) fakültəsinin birgə təşkilatçılığı ilə “Süni intellekt və rəqəmsal transformasiya dövründə universitetlərin informasiya təhlükəsizliyi: çağırışlar, risklər və institusional məsuliyyət” mövzusunda tədbir keçirilib.
“Tehsil365” xəbər verir ki, tədbiri giriş sözü ilə açan BMR fakültəsinin dekanı professor İbrahim Kazımbəyli müasir dövrdə süni intellektin sürətli inkişafı və rəqəmsal texnologiyaların geniş tətbiqinin ali təhsil müəssisələrinin fəaliyyətində yeni imkanlarla yanaşı, ciddi informasiya təhlükəsizliyi çağırışları da yaratdığını bildirib.
Professor qeyd edib ki, universitetlərin rəqəmsal transformasiyası tədris, elmi-tədqiqat və idarəetmə proseslərinin səmərəliliyini artırmaqla yanaşı, informasiya resurslarının, fərdi məlumatların və akademik məlumat bazalarının etibarlı qorunmasını zəruri edir. Onun sözlərinə görə, mövcud risklərin qarşısının alınması yalnız texniki vasitələrin tətbiqi ilə məhdudlaşmamalı, institusional məsuliyyətin gücləndirilməsi, müvafiq təhlükəsizlik siyasətinin formalaşdırılması, eləcə də universitet əməkdaşları və tələbələrin rəqəmsal savadlılığının artırılması istiqamətində kompleks tədbirlər həyata keçirilməlidir.
İbrahim Kazımbəyli vurğulayıb ki, informasiya təhlükəsizliyi müasir universitetlərin dayanıqlı inkişafının və rəqəmsal mühitə etimadın əsas şərtlərindən biridir. Bu baxımdan, süni intellekt texnologiyalarından təhlükəsiz, məsuliyyətli və etik prinsiplər əsasında istifadə edilməsi ali təhsil müəssisələri qarşısında duran mühüm vəzifələrdəndir.
İnformasiya Texnologiyaları kafedrasının müəllimi, texnika üzrə fəlsəfə doktoru Turan Cəfər-zadə “Süni intellekt dövründə rəqəmsal təhdidlər və müdafiə mexanizmləri: universitetlər üçün elmi əsaslandırılmış təhlükəsiz transformasiya konsepsiyası” mövzusunda çıxış edib.
Turan Cəfər-zadə bildirib ki, kiberhücumların əsas giriş qapıları – fişinq, oğurlanmış parollar və proqram təminatındakı zəifliklər – dəyişməsə də, süni intellekt bu üsullardan daha sürətli, ucuz və inandırıcı şəkildə istifadə etməyə imkan verir. O qeyd edib ki, süni intellekt eyni zamanda prompt injection və məxfi məlumatların xarici xidmətlərə sızması kimi yeni risklər də yaradır. Məruzəçinin sözlərinə görə, süni intellekt müdafiə prosesində faydalı vasitə olsa da, davamlı qiymətləndirmə və insan nəzarəti olmadan etibarlı hesab edilə bilməz.
Qeyd olunub ki, universitetlər üçün təklif edilən təhlükəsizlik konsepsiyası idarəetmə, texniki müdafiə və istifadəçi kompetensiyasını özündə birləşdirir. Bu yanaşmaya əsasən, təhlükəsizlik texnologiyadan imtina etmək deyil, ondan məsuliyyətli və davamlı şəkildə istifadə etmək deməkdir.
İnformasiya Texnologiyaları kafedrasının müəllimi Xatirə Aslanova çıxışında süni intellekt alətlərinin elmi tədqiqat işlərində plagiat hallarının yoxlanılması və aşkarlanması prosesində geniş istifadə olunduğunu bildirib. O qeyd edib ki, bu alətlər yoxlama prosesini sürətləndirsə də, bəzi hallarda düzgün olmayan nəticələr təqdim edə bilər. Məruzəçinin fikrincə, belə hallarda süni intellektin təqdim etdiyi nəticələr mütləq mütəxəssis tərəfindən yoxlanılmalı və yekun qərar insan nəzarəti ilə verilməlidir.
İnformasiya Texnologiyaları kafedrasının müdiri dosent Fikrət İbiyev çıxışında tədbirin əhəmiyyətindən danışaraq süni intellekt və rəqəmsal transformasiya şəraitində universitetlərdə informasiya təhlükəsizliyinin təmin olunmasının, mövcud risklərin vaxtında müəyyənləşdirilməsinin və qabaqlayıcı müdafiə mexanizmlərinin formalaşdırılmasının xüsusi aktuallıq kəsb etdiyini bildirib.
Sonda mövzu ətrafında müzakirələr aparılıb.