Azərbaycan Dillər Universitetinin (ADU) Türk Dünyası Araşdırmaları Mərkəzinin müdiri Cəlal İbrahimli və Filologiya fakültəsinin tələbələri “Qardaşlığın misraları: I Türkiyə–Azərbaycan Şeir Səsləndirmə Müsabiqəsi”nin final mərhələsi və mükafatlandırma mərasimində iştirak ediblər.
“Tehsil365” xəbər verir ki, Noyabrın 2-də Bakı Yunus Əmrə İnstitutunun təşkilatçılığı ilə keçirilən tədbirdə Cəlal İbrahimli Bakı Yunus Əmrə İnstitutunun dəvəti ilə müsabiqənin münsiflər heyətinin üzvü kimi iştirak edib.
Tədbirdə çıxış edən Cəlal İbrahimli əvvəlcə iştirakçıları salamlayaraq müsabiqənin təşkilini və bu təşəbbüsün əhəmiyyətini vurğulayıb. O, fikirlərini Kaşğarlı Mahmudun irsinə istinadla davam etdirərək dilimizin bütün sahələrdə “iki qoşqulu at kimi” yarışdırılmasının, onun imkanlarının müxtəlif istiqamətlərdə nümayiş etdirilməsinin vacibliyini qeyd edib. Şeirin xalqları və mədəniyyətləri bir araya gətirən gücünə diqqət çəkən Cəlal İbrahimli bu cür təşəbbüslərin Türk Dünyası Birliyinə xidmət etdiyini bildirib. O, çıxışının sonunda tədbirin təşkilatçılarına və iştirakçıların səsləndirdiyi fikirlərə görə təşəkkürünü ifadə edib.
Müsabiqənin ilkin seçim mərhələsindən sonra finala vəsiqə qazanan 12 iştirakçı Türkiyə və Azərbaycan ədəbiyyatından seçilmiş 12 müxtəlif şeiri səsləndiriblər. İştirakçılar poeziyanın birləşdirici gücü vasitəsilə iki xalqın ortaq ədəbi-mədəni dəyərlərini, qardaşlıq münasibətlərini və ədəbi irsini təqdim ediblər.
Münsiflər heyətinin qiymətləndirməsi əsasında müsabiqənin birinci, ikinci və üçüncü yerlərinin qalibləri, eləcə də “Yunus Əmrə” xüsusi mükafatının sahibi müəyyənləşdirilib. Qaliblərə plaketlər, kitablar və müxtəlif hədiyyələr təqdim olunub. Müsabiqənin təşkilinə verdikləri töhfəyə görə münsiflər heyətinin üzvləri təşəkkürnamələrlə təltif ediliblər.
Müsabiqə Türkiyə və Azərbaycan ədəbiyyatının tanıdılması, gənclərin poeziyaya marağının artırılması, eləcə də iki ölkənin ortaq ədəbi-mədəni dəyərlərinin təşviqi və Türk Dünyası arasında mədəni əlaqələrin möhkəmləndirilməsi baxımından əhəmiyyət daşıyıb.