Azərbaycan Dillər Universitetində (ADU) süni intellekt və rəqəmsal transformasiya dövründə universitetlərin informasiya təhlükəsizliyi məsələlərinə həsr olunan tədbir keçirilib.
“Tehsil365” xəbər verir ki, tədbir ADU-nun İnformasiya texnologiyaları kafedrası və Beynəlxalq münasibətlər və regionşünaslıq fakültəsinin birgə təşkilatçılığı ilə baş tutub.
Tədbirdə çıxış edən Beynəlxalq münasibətlər və regionşünaslıq fakültəsinin dekanı, professor İbrahim Kazımbəyli bildirib ki, süni intellektin sürətli inkişafı ali təhsil müəssisələri üçün yeni imkanlar yaratmaqla yanaşı, informasiya təhlükəsizliyi sahəsində də ciddi çağırışlar meydana çıxarır.
O qeyd edib ki, universitetlərdə rəqəmsal transformasiya yalnız tədris və idarəetmə proseslərinin səmərəliliyini artırmaqla məhdudlaşmamalı, şəxsi məlumatların, akademik bazaların və digər informasiya resurslarının qorunmasını da əhatə etməlidir.
Tədbirdə çıxış edən texnika üzrə fəlsəfə doktoru Turan Cəfərzadə süni intellekt dövründə rəqəmsal təhdidlər və müdafiə mexanizmləri barədə təqdimatla çıxış edib. O, kibertəhlükələrin daha sürətli və inandırıcı formaya düşdüyünü, süni intellektdən istifadənin isə davamlı nəzarət və qiymətləndirmə tələb etdiyini vurğulayıb.
Digər çıxışlarda süni intellekt alətlərinin elmi tədqiqatlarda plagiatın aşkarlanmasında istifadəsi, bu texnologiyaların mümkün yanlış nəticələri və insan nəzarətinin əhəmiyyəti diqqətə çatdırılıb.
Tədbir mövzu ətrafında müzakirələrlə yekunlaşıb.
Qeyd edək ki, rəqəmsal texnologiyaların ali təhsildə geniş tətbiqi universitetlər qarşısında informasiya təhlükəsizliyinin təmin olunması və rəqəmsal savadlılığın artırılması kimi mühüm vəzifələr qoyur.