Noyabrın 4-də Azərbaycan Dillər Universiteti (ADU) nəzdində fəaliyyət göstərən Türk Dünyası Araşdırmaları Mərkəzinin müdiri Cəlal İbrahimlinin rəhbərliyi ilə Orhun proqramı çərçivəsində ADU-da təhsil alan türk dövlətlərindən olan tələbələrlə görüş keçirilib.
“Tehsil365” xəbər verir ki, görüşdə Mərkəzin əməkdaşları Türkan Cəfərova və Tamara Musayeva, həmçinin ADU-nun Beynəlxalq şöbəsinin əməkdaşı Şəfaqət Kazımova iştirak ediblər.
Görüşün əsas məqsədi tələbələri Mərkəzin təşkil etdiyi tədbir və layihələrə cəlb etmək, onların Türk Dünyasına dair mədəni və elmi təşəbbüslərdə iştirakını təşviq etmək olub. Görüş zamanı tələbələrin Mərkəzin gələcək fəaliyyətində iştirakı, eləcə də öz ölkələrinin mədəniyyətini və milli dəyərlərini təqdim edə biləcəkləri təşəbbüslər ətrafında fikir mübadiləsi aparılıb.
Görüş çərçivəsində tələbələr Bakı Yunus Əmrə İnstitutunu da ziyarət edib, İnstitutun Azərbaycan üzrə koordinatoru Gökhan Seyhanla görüşüblər. Görüş zamanı Türk Dünyasının ortaq mədəni irsinin tanıdılması, tələbələrin birgə mədəni təşəbbüslərə cəlb olunması və gələcəkdə həyata keçirilə biləcək layihələr barədə müzakirələr aparılıb.
Müzakirə olunan təşəbbüslərdən biri “Türk Dünyasında Milli Geyimlər” adlı tədbirin təşkili olub. Tədbir çərçivəsində türk dövlətlərinin milli geyimlərinin, mətbəx nümunələrinin və ənənəvi yeməklərinin təqdim edilməsi nəzərdə tutulur. Bu təşəbbüs tələbələrə öz ölkələrinin mədəni xüsusiyyətlərini nümayiş etdirmək, eyni zamanda digər türk xalqlarının adət-ənənələri ilə yaxından tanış olmaq imkanı yaradacaq.