Noyabrın 3-də Azərbaycan Dillər Universitetinin (ADU) rektoru, akademik Kamal Abdulla Avropa dilləri kafedrasının kollektivi ilə görüş keçirib.
“Tehsil365” xəbər verir ki, görüşdə Rektorun müşaviri Coşqun Dadaşov, Tədris Məsələləri üzrə prorektor, dosent Şəfəq Şahməmmədova, Elm və İnnovasiya məsələləri üzrə prorektor, filologiya elmləri doktoru, professor Həmidə Əliyeva, Beynəlxalq Əlaqələr üzrə prorektor, dosent Jalə Qəribova, İnsan resursları şöbəsinin müdiri Məmməd İsmayılov, Maddi-Texniki və Maliyyə Məsələləri üzrə müşavir Nuşabə Tanrıverdiyeva, eləcə də Avropa dilləri kafedrasının müdiri, dosent Şəmsinur Aslanova, kafedranın əməkdaşı, İngilis və alman dilləri fakültəsinin dekanı, dosent Naibə Camalzadə, Təhsildə Xarici dillər kafedrasının müdiri, dosent Həqiqət Hacıyeva və kafedranın professor-müəllim heyəti iştirak ediblər.
Görüşün əsas məqsədi kafedranın fəaliyyəti, əldə etdiyi nailiyyətlər və gələcək inkişaf perspektivləri ilə tanış olmaq, əməkdaşların təklif və təşəbbüslərini dinləmək, həmçinin mövcud məsələlər ətrafında fikir mübadiləsi aparmaq olub.
Kafedranın müdiri, dosent Şəmsinur Aslanova çıxışında kafedranın əsas fəaliyyət istiqamətləri, elmi-pedaqoji potensialı, tədris-metodiki fəaliyyəti və həyata keçirilən tədbirlər barədə ətraflı məlumat verib. O, kafedranın illik fəaliyyət planına uyğun olaraq tədrisin keyfiyyətinin yüksəldilməsi, tələbələrin dil biliklərinin və kommunikativ bacarıqlarının inkişaf etdirilməsi, elmi-tədqiqat fəaliyyətinin genişləndirilməsi istiqamətində görülən işləri diqqətə çatdırıb.
Bildirilib ki, kafedranın əməkdaşları elmi-tədqiqat fəaliyyətini ardıcıl şəkildə davam etdirir, tədqiqat nəticələrini yerli və beynəlxalq elmi jurnallarda dərc etdirir, respublika və beynəlxalq səviyyəli elmi konfranslarda fəal iştirak edirlər. Bununla yanaşı, kafedrada elmi-maarifləndirici tədbirlər, seminarlar, tələbə müsabiqələri və müxtəlif akademik təşəbbüslər həyata keçirilir.
Tədris Məsələləri üzrə prorektor, dosent Şəfəq Şahməmmədova çıxışında tədris prosesinin keyfiyyətinin yüksəldilməsi, müasir tədris metodlarının tətbiqi və kafedranın fəaliyyətinin təkmilləşdirilməsi ilə bağlı fikirlərini bölüşüb.
Dosent Şaban Şabanov da çıxışında kafedranın elmi-pedaqoji fəaliyyətinin inkişafı, akademik potensialın gücləndirilməsi və tədris prosesində innovativ yanaşmaların tətbiqinin əhəmiyyətini vurğulayıb.
Görüş zamanı kafedranın gələcək fəaliyyət istiqamətləri, elmi potensialının daha da gücləndirilməsi, beynəlxalq akademik əməkdaşlığın genişləndirilməsi və tədris prosesinin müasir tələblərə uyğun təkmilləşdirilməsi ətrafında müzakirələr aparılıb. Kollektiv üzvləri öz təklif və təşəbbüslərini səsləndirərək onları maraqlandıran məsələlərlə bağlı fikirlərini bölüşüblər.
Universitetin rektoru, akademik Kamal Abdulla çıxışında kafedranın fəaliyyətinin daha da inkişaf etdirilməsinin, elmi və tədris istiqamətlərində yeni təşəbbüslərin həyata keçirilməsinin, əməkdaşların peşəkar potensialından səmərəli istifadə olunmasının vacibliyini vurğulayıb. O, universitetdə tədrisin keyfiyyətinin yüksəldilməsi və elmi fəaliyyətin inkişafı istiqamətində kafedraların rolunu xüsusi qeyd edib.