“Bu ilin yanvarında “Gözüm ol mənim” kitab klubunun yeddi yaşı tamam olur. Biz bu günədək altmışdan çox yerli və xarici yazarların kitablarını səsləndirib kitab klubumuza yerləşdirərək oxucuların istifadəsinə vermişik”.
Bu sözləri “Təhsil365”ə açıqlamasında “Gözüm ol mənim” youtube kitab klubunun idea müəllifi və rəhbəri Orxan Yusifov deyib.
O bildirib ki, “Gözüm ol mənim” kitab klubu tam olaraq könüllülük prinsipi əsasında fəaliyyət göstərir.
“Əslində bizim bundan əvvəl də bir fəaliyyətimiz var idi. Bildiyiniz kimi görmə əngəlli şəxslər üçün canlı şəkildə kitab oxuyurduq. Sonra düşündük ki, niyə bunun bir azda genişləndirməyək? Daha çox insana daha çox əlçatan eliyək bunu. Daha uzaq məsafədə yaşayan görmə əngəllilər də bundan faydalana bilsinlər. Eyni zamanda onlara yaxın yaşayan könüllü şəxsləri cəlb edərək canlı kitab oxuma imkanları yaradaq. Həmçinin bizim səsləndirdiyimiz kitabları da onlar üçün əlçatan edək”.