Məktəbdənkənar təhsil sahəsində islahatlara ehtiyac var
“Tehsil365” xəbər verir ki, “Məktəbdənkənar təhsil: Çağırışlar və perspektivlər” mövzusunda keçirilən konfransda MÜTDA-nın direktoru Eşqi Bağırov məktəbdənkənar fəaliyyətlərin əhəmiyyətini vurğulayıb.
O bildirib ki, tədbirin əsas məqsədi bu sahənin mövcud vəziyyətini qiymətləndirməklə yanaşı, onun gələcək inkişaf istiqamətlərini müəyyənləşdirməkdir. “Ölkəmizin gənc nəsli bizim ən qiymətli sərvətimizdir. Onların hərtərəfli inkişafını təmin etmək və müasir dövrün tələblərinə uyğun təhsil imkanları yaratmaq əsas hədəfimizdir”, – deyə Bağırov qeyd edib.
Məlumata görə, ötən tədris ilində məktəbdənkənar fəaliyyətlərə maraq yüksək olub. Belə ki, idman yarışlarında 1 milyondan çox, yaradıcılıq tədbirlərində isə 66,500-dən çox şagird iştirak edib.
Agentliyin keçirdiyi monitorinqlər göstərib ki, məktəbdənkənar təhsil müəssisələrinin fəaliyyətinin daha səmərəli və müasir standartlara uyğun təşkilinə ehtiyac var. Bu istiqamətdə hüquqi və normativ bazanın yenilənməsi, mövcud sənədlərin müasir tələblərə uyğunlaşdırılması və yeni normativ sənədlərin hazırlanması üzrə işlər davam etdirilir.