Məktəbəqədər təhsil müəssisələrinə qəbul zamanı tələb olunan sağlamlıq haqqında tibbi arayışların elektronlaşdırılması həyata keçirilib. Bu yenilik valideynlər və təhsil müəssisələri üçün prosesi daha sürətli və rahat edəcək.
"Tehsil365" xəbər verir ki, tibbi arayışlar artıq birbaşa “Məktəbəqədər Təhsil Müəssisələrinə Uşaqların Qəbulu” elektron sisteminə ötürüləcək. Bu proses aşağıdakı qaydada həyata keçirilir:
Məktəbəqədər təhsil müəssisəsinə qəbul olunan uşağın valideyni və ya digər qanuni nümayəndəsi müraciəti qəbul edildikdən sonra sağlamlıq haqqında tibbi arayış əldə etmək üçün müvafiq poliklinikaya müraciət edir.
Müayinə başa çatdıqdan sonra arayış 48 saat ərzində bq.edu.az portalında valideynin şəxsi kabinetinə və təhsil müəssisəsinin sisteminə əlavə olunur.
Məktəbəqədər təhsil müəssisələrinin rəhbərləri sağlamlıq haqqında tibbi arayışları elektron sistem üzərindən əldə edə bilirlər.
Valideynlər bq.edu.az portalına daxil olaraq övladlarının elektron tibbi sağlamlıq arayışını rahatlıqla əldə edə bilərlər.
Bu yenilik məktəbəqədər təhsil müəssisələrinə qəbul prosesində şəffaflığı və operativliyi artırmağa xidmət edir.