18-19 mart tarixlərində Elm və Ali Təhsil üzrə Dövlət Agentliyinin təşkilatçılığı ilə Qarabağ Universitetində elmi tədqiqat və beynəlxalq əməkdaşlıq imkanlarına həsr olunmuş info-sessiyalar keçirilib. Tədbirdə universitetin tələbə, müəllim və inzibati heyəti üçün müxtəlif mövzularda təqdimatlar edilib.
“Tehsil365” xəbər verir ki, açılış nitqi ilə çıxış edən Qarabağ Universitetinin rektoru Şahin Bayramov info-sessiyaların əhəmiyyətini vurğulayaraq, bu cür tədbirlərin elmi tədqiqatların inkişafına və beynəlxalq əməkdaşlığın genişlənməsinə töhfə verdiyini qeyd edib.
Sessiyalar çərçivəsində Agentliyin Elmi müəssisələrlə iş şöbəsinin əməkdaşları Nərminə Abdullayeva və Ülviyyə Gözəli tədqiqatçılar üçün vacib olan “Scopus” və “Science Direct” məlumat bazalarından səmərəli istifadə üsulları, eləcə də “Scopus AI” süni intellekt aləti ilə tədqiqat bacarıqlarının inkişafı mövzusunda təqdimatlar ediblər.
Beynəlxalq əməkdaşlıq imkanları ilə bağlı sessiyada isə Agentliyin Beynəlxalq əməkdaşlıq şöbəsinin əməkdaşı Həcər Kəlbiyeva elm və ali təhsilin beynəlmiləlləşməsi, mövcud beynəlxalq əməkdaşlıq imkanları və yerli, xarici tələbələr üçün nəzərdə tutulan təqaüd proqramları barədə iştirakçılara ətraflı məlumat verib.
Tədbirin sonunda iştirakçıların sualları cavablandırılıb və mövzu ətrafında müzakirələr aparılıb.