Təbriz Talıbov (kiçik gizir)
Şəhidimiz haqqında qısa həyat hekayəsi
Həmin gün o biri günlərdən fərqli olaraq çox narahat idim. Təbrizlə son danışığımız oktyabrın 22-si olmuşdu.Oktyabrın 23-ü, yəni həmin gün Zəngilan uğrunda gedən döyüşlərdə Təbriz şəhidlik zirvəsinə ucalmışdı. Elə bil ürəyimdə olan o narahatlıq bundan xəbər vermişdi. Təbriz 2012-2014-cü illərdə hərbi xidmətdə olmuşdur.O, hərbi xidmətini başa vurduqdan sonra geri gəldi,amma bu ayrılıq çox çəkmədi və 2015-ci ildə yenidən hərbiyə qayıtdı.Təbriz Sərhəd Qoşunlarında “N” saylı hərbi hissədə işləyirdi.O, aprel döyüşlərinin də fəal iştirakçılarından olmuşdu.Həmin döyüşlərdə də öz sədaqəti və fədakarlığı ilə seçilirdi. Təbriz 2020-ci il Vətən müharibəsində Füzuli,Ağdam,Cəbrayıl və Zəngilan uğrunda gedən döyüşlərdə qəhrəmancasına vuruşmuşdur. O,atası ilə danışığında erməniləri bu torpaqlardan qovacaqlarını,onların ayaqlarının bu torpaqda qalmayacağını və Azərbaycan ordusunun düşmənlər üzərində qələbə qazanacağını bildirirdi.Təbriz ailəli idi.Onun iki qız övladı var. O, ailəsində olan hər kəsə çox dəyər verirdi.O həm böyük,həm də kiçik yeri bilirdi. Təbriz həyat yoldaşı ilə danışığında həyat yoldaşından onun qızları üçün oxuduğu laylanı o olmayan vaxtları qızlarına dinlətməyini istəmişdi. Təbrizin qızı ilə son şəkli gecə saat 4-də çəkilmişdi.Həmin vaxt həm Mələk,həm də Kifayət oyaq idi. Mələk atasının getməyini istəmirdi. Təbriz hər iki övladını çox istəyirdi,amma Mələk ona oxşadığı üçün o bununla həm fəxr edir,həm də onu bir başqa istəyirdi. O, həmişə bildirirdi ki,mən bir gün gəlməsəm,şəhid olsam qızlarıma bildirərsiniz ki,atanız şəhidlik zirvəsinə ucalıb.Təbriz bu yolu özü seçmişdi və hər zaman şəhid olmağı arzulayırdı və arzuladığı kimi şəhidlik zirvəsi ona da qismət olmuşdu.Təbriz son gedişində Mələyi öpüb,qoxlaya bilsə də, qızı Kifayəti öpmək ona qismət olmamışdı. O, qardaşı Mübariz ilə son danışığında qardaşından xahiş edir ki, şəhid olarsa, övladlarından muğayat olsun. Sanki Təbriz şəhid olacağını əvvəlcədən hiss edirmiş. Mən oğlumla fəxr etmişəm və həmişə də fəxr edəcəyəm.Mənim Təbrizdən başqa iki oğlum da var.Onlar da hər zaman Vətən uğrunda xidmət etməyə hazırdırlar,çünki vətəni qorumaq bütün Azərbaycan vətəndaşının borcudur. Təbriz Vətən uğrunda son ana kimi vuruşmuş və qəhrəmancasına şəhid olmuşdur. O, Lerik rayonunun Ləkər kəndində dəfn olunub. Təbriz Talıbov ölümündən sonra “Vətən uğrunda” ,” Zəngilanın azad olunmasına görə”medalları və 3-cü dərəcəli “Vətənə xidmətə görə” ordeni ilə təltif olunub.
Vətən uğrunda canından keçmiş qəhrəmanları unutmuruq və heç vaxt da unutdurmuruq.
Şəhid anasının dilindən nəql olunurmuş kimi təqdim edilib.
Hekayədə yazılanlar həqiqətləri əks etdirir.