Milli Kitabxanada uşaq ədəbiyyatının klassiki və uşaq dramaturgiyasının banisi Xanımana Əlibəylinin anadan olmasının 105 illiyi münasibətilə “Əməkdar incəsənət xadimi Xanımana Əlibəyli”, xalq yaradıcılığının yorulmaz tədqiqatçısı Azad Nəbiyevin yubileyi ilə əlaqədar isə “Professor Azad Nəbiyev - 80” adlı ənənəvi kitab sərgiləri açılıb.
Kitabxanadan “Tehsil365"ə bildiriblər ki, “Əməkdar incəsənət xadimi Xanımana Əlibəyli” adlı kitab sərgisində müəllifin əsərləri, tərcümə etdiyi kitablar, həyat və yaradıcılığı haqqında ədəbiyyatlar, jurnal və dövri mətbuat materialları, sözlərinə bəstələnmiş musiqi notları nümayiş olunur.
“Professor Azad Nəbiyev - 80” adlı sərgidə isə professorun əsərləri, tədqiqatları, ali məktəblər üçün dərs vəsaitləri, tərcümələri, tərtibçisi, redaktoru, rəyçisi və məsləhətçisi olduğu, ön söz yazdığı kitablar, həyat və yaradıcılığı haqqında ədəbiyyatlar təqdim edilir.
Ənənəvi kitab sərgiləri bir həftə davam edəcək.