Azərbaycan İlahiyyat İnstitutu yanında Bakı İlahiyyat Kolleci 2025/2026-cı tədris ili üçün dini-mənəvi xidmət ixtisası üzrə tələbə qəbulu elan edir.
Bu barədə “Tehsil365”ə İlahiyyat İnstitutundan məlumat verilib.
Aşağıda qeyd edilən kateqoriyaya aid abituriyentlər Bakı İlahiyyat Kollecini seçə bilərlər.
-Tam (11 illik) orta təhsil bazası əsasında (cari və əvvəlki illərin məzunları) Dövlət İmtahan Mərkəzi (DİM) tərəfindən keçirilən buraxılış (qəbul) imtahanında iştirak edən və minimum 40 bal toplayan abituriyentlər;
-Ümumi (9 illik) orta təhsil bazası əsasında (cari və əvvəlki illərin məzunları) Dövlət İmtahan Mərkəzi tərəfindən keçirilən buraxılış (qəbul) imtahanında iştirak edən və minimum 50 bal toplayan abituriyentlər;
-Hər iki təhsil bazası əsasında DİM-in saytında Dini-Psixoloji Komissiya üzrə qeydiyyatdan keçib müsahibədə “məqbul” alan abituriyentlər.
Kollecə 9 illik orta təhsil bazası əsasında qəbul olmaq istəyən abituriyentlər (yalnız cari və keçən ilin məzunları) Dini-Psixoloji Komissiyaya qeydiyyat başlayana qədər DİM-ə ərizə ilə müraciət etməlidirlər.
Bakı İlahiyyat Kollecinə qəbul yalnız dövlət sifarişi əsasındadır.
Ünvan: Bakı şəhəri, Yasamal rayonu, Məhəmməd Naxçıvani, 29