Bakı Dövlət Universitetinin (BDU) Karyera və Məzunlarla İş Mərkəzi və Tələbə Gənclər Təşkilatının (TGT) Geologiya fakültəsi üzrə üzvlərinin birgə təşkilatçılığı ilə “Süni intellekt dövründə karyera planlaması” mövzusunda interaktiv təlim keçirilib.
Bu barədə “Tehsil365”ə BDU-dan bildirilib.
BDU-nun Karyera və Məzunlarla İş Mərkəzinin mütəxəssisi Pərvanə Babayeva süni intellektin qlobal miqyasda əmək bazarına təsiri, rəqəmsal texnologiyaların tətbiqi ilə bəzi peşələrin aradan qalxması və yeni peşə sahələrinin meydana çıxması, insan potensialının süni intellektlə sinxron şəkildə inkişaf etdirilməsinin vacibliyi kimi məsələlərə toxunub. O, belə təlimlərin fərdi bacarıqların inkişaf etdirilməsi, çevik öyrənmə və rəqəmsal savadlılığının artırılmasında önəm kəsb etdiyini deyib.
Daha sonra təlimin debat sessiyası keçirilib. Bu hissədə tələbələr “Süni intellektin karyera yolunda yaratdığı müsbət imkanlar” və “Süni intellektin peşə inkişafına gətirdiyi mənfi təsirlər” mövzularında müzakirə aparıblar. Komandalar arqumentlərini əsaslandıraraq, süni intellektin müxtəlif peşə sahələrinə təsiri, etik və sosial tərəfləri, insan resurslarına ehtiyacın dəyişməsi və yeni bacarıqlara yönəlmə haqqında maraqlı çıxışlar ediblər.
Təlim müddətində tələbələr yalnız nəzəri biliklərlə deyil, real əmək bazarına dair praktiki nümunələrlə də tanış olublar. Onlara CV tərtibatı, müsahibələrə hazırlıq, şəxsi brendin formalaşdırılması yolları da izah edilib.
