Qazax-Tovuz Regional Təhsil İdarəsinin tabeliyində fəaliyyət göstərən ümumi təhsil müəssisələrində çalışan və bu il keçirilmiş təkrar sertifikatlaşdırma prosesində müvafiq keçid balını toplamayan müəllimlərlə görüşlərə start verilib.
Bu barədə "Tehsil365"ə Qazax-Tovuz Regional Təhsil İdarəsindən məlumat verilib. Bildirilib ki, regional idarənin müvafiq əmrinə əsasən, təkrar sertifikatlaşdırma mərhələsində uğur qazana bilməyən təhsilverənlərlə işin təşkili məqsədilə xüsusi komissiya yaradılıb. Müəllimlər 2 iyul - 31 iyul 2025-ci il tarixləri arasında həftənin I-V günləri saat 14:00-dan 17:00-dək yaşadıqları və işlədikləri ərazi üzrə rayon təhsil sektorlarına yaxınlaşaraq komissiyaya müraciət edə bilərlər.
Qeyd olunub ki, görüşlər zamanı müəllimlərin ailə tərkibi və sosial vəziyyəti təhlil olunacaq, onların müvafiq qeyri-pedaqoji vakansiyalara uyğunluq meyarları müəyyənləşdiriləcək.
Komissiyaya müraciət edən şəxslər şəxsiyyət vəsiqəsi, diplom, əmək kitabçasının surətləri və sosial statuslarını təsdiq edən sənədləri təqdim etməlidirlər.