Görmə məhdudiyyətli yazar, "Gözün ol mənim" kitab klubunun rəhbərlərindən biri və "Tehsil365" informasiya agentliyinin poeziya bölməsinin rəhbəri Zəkəriyyə Əlisa oğlu Qurbanovun bu gün doğum günüdür.
"Tehsil365" xəbər verir ki, Zəkəriyyə Qurbanov 1988-ci ilin 11 iyulunda Biləsuvar rayonunun Amankənd kəndində anadan olub. 1994-cü ildə Dərvişli kənd orta məktəbinin I sinfinə daxil olub. Lakin 2000-ci ildən etibarən görmə qabiliyyətini itirdiyinə görə təhsilini Bakı şəhərindəki 5 saylı fiziki qüsurlu uşaqlar üçün orta internat məktəbində davam etdirib və 2010-cu ildə həmin məktəbi bitirib.
Elə həmin il Sosial-Pedaqoji Kollecə daxil olaraq 2013-cü ildə buranı uğurla başa vurub. 2014-cü ildə Bakı Dövlət Universitetinin Kitabxanaçılıq və İnformatika fakültəsinə qəbul olunub və 2018-ci ildə ali təhsilini tamamlayıb.
Orta məktəb illərindən bədii yaradıcılıqla məşğul olan Zəkəriyyə Qurbanov 19 illik ədəbi fəaliyyəti ilə seçilir. O, eyni zamanda musiqiyə də maraq göstərərək 38 saylı Musiqi məktəbində nağara və qarmon ixtisası üzrə təhsil alıb.
Fəal ictimai fəaliyyəti ilə seçilən yazar "Gözün ol mənim" kitab klubunun yaradıcılarından biri kimi, görmə məhdudiyyətli şəxslərin ədəbiyyata və kitaba çıxış imkanlarının artırılmasına töhfə verir.
Şeirləri ilə oxucuların qəlbinə yol tapan Zəkəriyyə Qurbanovun iki nümunəsini təqdim edirik:
KAŞ
Silinib gedəydi duman, bulud, çən,
İnsan saçlarına düşməyəydi dən.
Zülümdən, əzabdan, qəmdən-qüssədən
Gözlər kədərlənib dolmayaydı, kaş.
Sevgiylə vuraydı bütün ürəklər,
Qol-qanad açaydı arzu-diləklər;
Könüllər oxşayan güllər, çiçəklər
Təzə-tər qalaydı, solmayaydı, kaş.
Ömrü uzanaydı səadətlərin,
Zamanı bitəydi şikayətlərin;
Vüsala yol gedən məhəbbətlərin
Sonunda ayrılıq olmayaydı, kaş...
NİYƏ
Görəsən nə üçün dəyişir zaman,
Yaxşılar yamana satılır niyə?
Halal adamların halal tikəsi
Haram tikələrə qatılır niyə?
Bu dünya bir ümman, biz - üzən gəmi,
Coşanda güzəştə getmir heç kimi...
Həyatın dərdləri ağır yük kimi
Kasıbın çiyninə çatılır niyə?..
Namərdə pay olur mərdin çörəyi,
Allah, əsirgəmə bizdən köməyi;
Zalım adamların daşı-kəsəyi
Məzlumun dalınca atılır, niyə?
"Tehsil365" İnformasiya Agentliyinin rəhbərliyi və kollektivi adından Zəkəriyyə Qurbanovu doğum günü münasibətilə təbrik edir, gələcək fəaliyyətində ona yeni-yeni uğurlar arzu edirik.