2025-ci ildə Bakıda kirayə mənzillərin qiymətində ciddi artım müşahidə olunur. Bu artım xüsusilə tələbələrin və gənclərin yaşayış tapmaq imkanlarını daha da çətinləşdirir. Mütəxəssislər problemin həm iqtisadi, həm də sosial nəticələrinin olacağı barədə xəbərdarlıq edirlər.
Daşınmaz əmlak üzrə ekspert Elnur Azadov Tehsil365-ə açıqlamasında bildirib ki, kirayə bazarında qiymət artımı əsasən tikinti sektorundakı durğunluqla bağlıdır:
“Əsas səbəb tikinti şirkətləri arasında rəqabətin zəifləməsidir. Rəqabət olmadıqda, qiymətləri aşağı salan mexanizm də işləmir. Son 4-5 ildə tikinti icazələrinin sayı azalıb. Bu da bazarda təklifin kəskin azalmasına səbəb olub və qiymətlər qalxmağa başlayıb".
Ekspertin fikrincə, kirayə mənzil tapmaq çətinliyi xüsusilə tələbələr üçün sosial problemə çevrilməkdədir:
“Yataqxanalar köhnəlib, çoxu istifadəyə yararsız vəziyyətdədir. Müasir standartlara cavab verən tələbə şəhərcikləri yoxdur. Bu barədə illərdir müzakirələr aparılır, lakin hələ də real addımlar atılmayıb. Hətta bəzi tenderlərin keçirildiyi deyilsə də, nəticə yoxdur".
Elnur Azadov əlavə edib ki, köhnə yaşayış fondlarının azalması da kirayə bazarına mənfi təsir edir:
“Əvvəllər Sovetski, Qubinka, Yasamal, Nərimanov və digər ərazilərdə ucuz kirayə evlər çox idi. Amma bu köhnə fondlar söküldükcə, təklif də azalır. Yeni tikililər isə baha başa gəldiyindən, kirayə qiymətləri də mütənasib olaraq artır".
Ekspert yaxın illərdə bu sahədə ciddi yumşalma gözləmədiyini də bildirib:
“Köhnə evlərin sökülməsi və yenilərinin istifadəyə verilməsi uzun prosesdir. Təmir işlərinin aparılması, yeni layihələrin reallaşması zaman tələb edir. Bu səbəbdən yaxın 1-2 ildə qiymətlərin enməsi real görünmür".
Xatırladaq ki, hazırda Bakıda 1 otaqlı mənzilin kirayə qiyməti orta hesabla 450–600 manat arasında dəyişir. Universitetlərə yaxın ərazilərdə isə bu rəqəm daha yüksəkdir.