Şirvan-Salyan Regional Təhsil İdarəsində 2024-2025-ci tədris ilinin yekunlarına həsr olunmuş hesabat tədbiri keçirilib.
“Təhsil365” xəbər verir ki, tədbirdə Məktəbəqədər və Ümumi Təhsil üzrə Dövlət Agentliyinin direktor müavini Arslan Hacıyev, Şirvan-Salyan Regional Təhsil İdarəsinin müdiri, struktur bölmə rəhbərləri və müvafiq sektorların əməkdaşları iştirak ediblər.
Təqdimat idarə müdiri Rəşad Musayev tərəfindən təqdim olunub. O, cari tədris ili ərzində region üzrə təhsilin inkişaf göstəriciləri, çətinliklər, həyata keçirilmiş layihələr və əldə olunmuş nailiyyətlər barədə ətraflı məlumat verib. Statistik göstəricilər əsasında aparılmış müqayisəli təhlillər iştirakçıların diqqətinə çatdırılıb, təhsil sahəsində keyfiyyətin yüksəldilməsi istiqamətində görülmüş işlər və gələcək perspektivlər vurğulanıb.
Tədbir zamanı monitorinq və qiymətləndirmələrin nəticələrindən danışılıb, müəllim və şagird uğurları, kadr təminatı, infrastruktur yenilikləri kimi önəmli məsələlər müzakirə olunub. Eyni zamanda iştirakçılar arasında fikir mübadiləsi aparılıb və növbəti tədris ili üçün fəaliyyət istiqamətləri müəyyənləşdirilib.
Səfər çərçivəsində Arslan Hacıyev Neftçala şəhər 2 nömrəli körpələr evi–uşaq bağçası və Neftçala şəhəri Elton Həbibov adına 4 nömrəli tam orta ümumi təhsil məktəbində olub.
Bağçada yaradılmış şəraitlə tanış olan direktor müavini pedaqoji heyətlə fikir mübadiləsi apararaq tədris və tərbiyə prosesinin təşkili ilə bağlı fikirlərini bölüşüb.
Daha sonra tam orta ümumi təhsil müəssisəsində aparılan təmir-tikinti işləri ilə yerində tanış olub.