Azərbaycan Dövlət Neft və Sənaye Universitetinin (ADNSU) gələcəkdə “Azİİ” adı ilə tanıdılması ideyasına Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli münasibət bildirib. Ekspert bu təşəbbüsü tənqidi dəyərləndirib və bunun strateji baxımdan anlaşılmaz olduğunu qeyd edib.
Əmrah Həsənlinin fikrincə, bu yanaşma bir təhsil brendinin, bir akademik kimliyin formadan məzmuna deyil, əksinə məzmundan forma qaytarılması kimi görünür. Bu barədə, təhsil eksperti “Tehsil365”ə bildirib. O qeyd edib ki, universitetlər yalnız elm ocağı deyil, həm də milli kimliyin daşıyıcıları və strateji düşüncənin mərkəzləridir:
“Belə olduğu halda, universitet adlarının dəyişdirilməsi sıradan bir texniki məsələ kimi deyil, ideoloji və ictimai məsuliyyət çərçivəsində qiymətləndirilməlidir.”
Ekspert “Azİİ” adının təkrar istifadəsinin nə ali təhsil sisteminin çağdaş reallıqları ilə səsləşdiyini, nə də cəmiyyətin gözləntilərinə cavab verdiyini vurğulayıb:
“Abreviaturalar beynəlxalq təcrübədə yalnız o zaman uğurla işləyir ki, həmin ad arxasında yüzillik elmi məktəb, tanınan beynəlxalq mövqe və açıq kommunikasiya strategiyası dayansın. “Azİİ” isə nə bu gün üçün tanınan akademik brenddir, nə də müasir təhsil sisteminə inteqrasiya olunan ad formasıdır.”
Ən önəmli məqamlardan biri kimi təhsil eksperti qeyd edir ki, abbreviatura ictimaiyyətə açıqlama təqdim edilmədən təqdim olunur:
““Azİİ” nəyin qısaltmasıdır? Bu sualın cavabı verilmədikcə, ad da, ideya da qeyri-ciddi görünür.”
Əmrah Həsənli universitetin mövcud adının – Azərbaycan Dövlət Neft və Sənaye Universiteti – bu ali məktəbin mahiyyətini dəqiq əks etdirdiyini vurğulayıb və belə bir brendi dəyişməyin strateji baxımdan yanlış olduğunu bildirib:
“Bu ad neft ölkəsi olan Azərbaycanın mühəndislik, texnologiya və sənaye üzrə ixtisaslaşmış bir elm ocağına sahib olduğunu birbaşa bəyan edir. Bu, qürurverici bir göstəricidir və onu azaltmaq, eybəcər səslənən və heç bir rəsmi təməli olmayan bir adla əvəzləmək sadəcə brend itkisidir”.
Sonda təhsil eksperti qeyd edir ki, əgər məqsəd yenilikdirsə, bu adla deyil, məzmunla və idarəetmə ilə həyata keçirilməlidir:
“Təhsildə dəyişiklik təkcə köhnəni xatırlamaqla deyil, yenini inşa etməklə baş verir. Bu isə keçmişə qayıdaraq deyil, gələcəyə baxaraq mümkündür”.