2avqust – Azərbaycan Kinosu Günü münasibətilə silsilə tədbirlər çərçivəsində Nizami Kino Mərkəzində təntənəli gecə keçirilib.
“Tehsil365” xəbər verir ki, gecənin açılışında Mədəniyyət nazirinin müavini Saadət Yusifova çıxış edərək Azərbaycan kinosunun zəngin tarixi, inkişaf perspektivləri və bu sahəyə dövlət tərəfindən göstərilən həssas yanaşmanı vurğulayıb. O, ölkə başçısının diqqət və qayğısı nəticəsində kino sahəsində həyata keçirilən layihələrdən və əldə olunan nailiyyətlərdən bəhs edib.
Daha sonra Xalq artisti Rasim Balayev dövlət səviyyəsində kino xadimlərinə göstərilən qayğını yüksək qiymətləndirərək milli kino sənətinin yeni inkişaf mərhələsinə qədəm qoyduğunu bildirib. Tədbirdə çıxış edən Xalq artisti Fəxrəddin Manafov kino sahəsinə göstərilən dəstəyə görə təşəkkürünü ifadə edib. O, ölkə rəhbərliyinin diqqət və qayğısına görə dərin minnətdarlığını bildirərək fəaliyyətini bundan sonra da böyük əzmlə davam etdirəcəyini qeyd edib.
Mərasimdə ARKA-nın baş direktoru Rəşad Əzizov geniş nitq ilə çıxış edərək milli kino irsinin beynəlxalq miqyasda tanıdılması istiqamətində görülən işlər və həyata keçirilən layihələr barədə məlumat verib. R. Əzizov həmçinin, kino sənayesi iştirakçılarını sevindirən daha bir xəbəri açıqlayaraq 2025-ci il üzrə “Dövlət sifarişi ilə istehsal ediləcək film layihələri müsabiqəsi”nin elan edildiyini tədbir iştirakçılarının diqqətinə çatdırıb.
Tədbirin aparıcısı Azər Aydəmir bütün çıxışçılara təşəkkür edərək yeni nəsil yaradıcı qüvvələrin kino sahəsinə verdiyi töhfələrdən məmnunluğunu bildirib.
Gecə çərçivəsində Mədəniyyət Nazirliyi yanında fəaliyyət göstərən Azərbaycan Respublikasının Kino Agentliyinin dəstəyi ilə istehsal olunmuş, kino sənətinin müxtəlif janrlarını əks etdirən ekran əsərləri nümayiş etdirilib. “Bilməcə” (animasıya serialı, “Alov” animasiya studiyası, prodüser Oqtay Yusibov), “Oriondan Sevgilərlə” (qısametrajlı bədii film, rejissor Rafiq Hacıyev), “Torpağı sən yaşayasən” (qısametrajlı bədii film, rejissor Samir Kərimoğlu) və “Düşmüş mələk” (qısametrajlı bədii tələbə filmi, rejissor Elmar Fərzəli) filmləri tamaşaçılar tərəfindən böyük maraq və rəğbətlə qarşılanıb.