Sumqayıt Dövlət Universiteti (SDU) 2025/2026-cı tədris ili üçün 131 fənn üzrə elmi-pedaqoji potensiala malik kadrların müddətli əmək müqaviləsi əsasında işə qəbulunu elan edib.
Tehsil365-ə universitetdən bildirilib ki, işə qəbul olunan müəllimlər müasir tədris standartlarına uyğun olaraq müxtəlif ixtisas fənlərinin tədrisini həyata keçirəcəklər. Məqsəd – yüksək ixtisaslı, innovativ düşüncəli və əmək bazarının tələblərinə cavab verən kadrların cəlb olunmasıdır.
Pedaqoji heyətin işə qəbulu sosial elmlərdən mühəndis sahələrinə, biologiyadan informasiya texnologiyalarına qədər geniş spektri əhatə edir. Aşağıdakı kafedralar üzrə müəllim qəbulu həyata keçiriləcək:
Fəlsəfə, sosiologiya və politologiya kafedrası: sosial-siyasi təhlil, lobbiçilik, sosial işdə tədqiqat metodları, sosial proqnozlaşdırma və məntiq.
Pedaqogika və psixologiya kafedrası: inklüziv təhsilə dair fənlər – tiflo-, surdo- və oliqofrenopedaqogika, korreksiya və erkən diaqnostika metodları.
Xarici dillər kafedrası: tərcümənin nəzəriyyəsi, frazeologiya, linqvomədəni aspektlər və kommunikativ qrammatika.
Mühasibat, iqtisadiyyat və biznesin idarə edilməsi kafedraları: MBA proqramlarını da əhatə edən maliyyə texnologiyası, beynəlxalq iqtisadiyyat, marketinq tədqiqatları və layihələrin idarə edilməsi üzrə fənlər.
Biologiya və kimya kafedraları: sitologiya, bitki fiziologiyası, aromatik birləşmələrin kimyası, kraun efirlər, termokimya və kimyəvi kinetika.
Fizika kafedrası: radiofizika, aşağı temperaturlar fizikası, eksperimental termofizika və sensor texnologiyalar.
Riyaziyyat və informatika: diferensial tənliklər, riyazi modelləşdirmə, internet texnologiyaları, kibertəhlükəsizlik və proqram təminatının inkişafı.
Kimya mühəndisliyi, avtomatika, mexanika və energetika kafedraları: sənaye avadanlıqları, termodinamika, qazma texnologiyaları, nanoelektronika və robot sistemləri.
Elmi dərəcəyə, tədris və ya istehsalat sahəsində təcrübəyə malik mütəxəssislər, həmçinin sənayedə çalışan praktiki bilik və bacarıqlara yiyələnmiş kadrlar vakansiyalara müraciət edə bilərlər.