Ekspert Rasif Dünyamalı 2024-cü ildə bir neçə universitetin akkreditasiya prosesinə işəgötürən kimi cəlb olunduğunu bildirib. O qeyd edib ki, yekun hesabat açıqlanmasa da, müşahidələrinə görə bir neçə istisna olmaqla, ali təhsil müəssisələrində kadr hazırlığında ciddi problemlər mövcuddur: “Formalaşan kadrlar çox vaxt yalnız öz şəxsi səyləri və ailələrinin dəstəyi hesabına nəsə edə bilirlər”.
Ekspertin sözlərinə görə, bu problemlərin həlli üçün təhsilə kənar və davamlı bir baxış lazımdır: “Azərbaycanda bu funksiyanı Təhsildə Keyfiyyət Təminatı Agentliyi (TKTA) yerinə yetirir. Mən onları ‘təhsilin gözü’ adlandırıram”.
Rasif Dünyamalı 5 avqustda ali təhsil müəssisələrinin akkreditasiya meyarlarının yenilənməsi ilə bağlı keçirilən dəyirmi masada iştirak etdiyini və müzakirələrin faydalı keçdiyini vurğulayıb: “Yeni meyarlar universitetlərin inkişafına təkan verəcək. Əgər bu meyarlara uyğun fəaliyyət göstərsələr, 5 ilə ciddi dəyişikliklər əldə etmək olar”.
O, müzakirələrdə bir neçə təklif irəli sürdüyünü də açıqlayıb. Bunlara akkreditasiya prosesində tələbə, müəllim, işəgötürən və ictimaiyyətin məmnunluğunun ölçülməsi, prosesin elektronlaşdırılması və Məzun-Karyera Mərkəzlərinin fəaliyyətinin nəticələr əsasında qiymətləndirilməsi daxildir.
Ekspert sonda bildirib ki, TKTA-nın uğurlu fəaliyyəti təhsil sisteminin inkişafına müsbət təsir göstərəcək və gələcəkdə məktəbəqədər və ümumtəhsil müəssisələrinin də akkreditasiya prosesinə cəlb olunması vacibdir.