Avqustun 18-də Oğuz rayon MKS-nin 13 N-li Kərimli kənd kitabxanasının təşkil etdiyi "Oğuz, qonağın var!" ədəbi layihəsi çərçivəsində Oğuz rayon Mədəniyyət Mərkəzində tanınmış Azərbaycan yazıçısı, şairi və publisisti Gülxani Pənah ilə oxucuların görüşü keçirilib.
“Tehsil365” xəbər verir ki, Gülxani Pənah filologiya üzrə elmlər doktoru, dosentdir. O, Azərbaycan Yazıçılar Birliyinin İdarə Heyətinin üzvü, Yazıçı Qadınlar Şurasının sədri, həmçinin Azərbaycan Jurnalistlər Birliyi və İLESAM-Türkiyə İlim və Ədəbiyyat əsəri Sahibləri Məslək Birliyinin üzvüdür. O, həmçinin "İskit" Beynəlxalq İctimai Birliyinin prezidenti və "İskit" jurnalının baş redaktorudur. Yazıçı Azərbaycan Memarlıq və İnşaat Universitetində müəllimlik edir.
Gülxani Pənah 60-dan çox elmi-nəzəri və ədəbi-bədii kitabın müəllifidir, 400-dən çox elmi məqalənin, 50-dən çox kitabın tərtibçisi və üç dərsliyin müəllifidir. O, iki yüzdən çox kitabın redaktoru və 35 cildlik "Seçilmiş əsərlər"inin 12 cildinin çapını həyata keçirib.
Tədbirdə İsmayıllı-Qəbələ-Oğuz regional yazıçılar birliyinin sədri, rayon idarə və müəssisələrinin əməkdaşları, mədəni-maarif müəssisələrinin əməkdaşları, rayon ziyalıları, məktəblilər və gənc oxucular iştirak edib. Görüşdə əvvəlcə Vətən uğrunda canlarından keçmiş şəhidlərin xatirəsi bir dəqiqəlik sükutla yad olunub.
Tədbir zamanı şairin şeirləri səsləndirilib, çıxış edənlər Gülxani Pənahın yaradıcılığı haqqında fikirlərini bölüşüblər və iştirakçılar maraqlandıran sualları yazıçıya ünvanlayıblar. Sonda yazıçı oxuculara kitablarını hədiyyə edib, onlarla imza şəkli çəkdirib.