Naxçıvan Muxtar Respublikası üzrə 20 məktəbəqədər təhsil müəssisəsi fəaliyyət göstərir ki, hazırda bu müəssisələrdə 3425 uşaq təhsil alır.
“Tehsil365” xəbər verir ki, bunu Naxçıvan Muxtar Respublikası Təhsil Nazirliyinin Məktəbəqədər və ümumi təhsilin idarəolunması şöbəsinin müdiri Elşən Qəbulov deyib.
O bildirib ki, 2025/2026-cı tədris ili üçün əlavə 1600-ə yaxın vakant yerlər müəyyənləşib ki, bu da ötən tədris ili üçün, xüsusən də orta yaş qruplarında artım ilə müşahidə olunur: "Ötən tədris ilində məktəbəqədər təhsil müəssisələrindən məktəbəhazırlıq qruplarına 1200-ə yaxın uşaq qəbul olunub. Məktəbəqədər təhsil müəssisələrində bir çox monitorinqlər aparılıb, təhsil müəssisələrinin fəaliyyəti ətraflı araşdırılıb.Monitorinqlər zamanı təhsil müəssisələrində bir sıra nöqsanlar müəyyənləşdirilib, bu sahədə müvafiq addımlar atılıb. Monitorinqlər zamanı qida normalarına düzgün riayət olunmaması, ərzaq məhsullarının saxlanması sahəsində bir sıra problemlərin olduğu, ən əsası isə uşaqların vaxtında elektron sistemdən çıxarılmaması, elektron sistemdə mövcud uşaqların qruplarda olan uşaqlarla uyğun gəlməməsi kimi ciddi problemlər aşkarlanıb. Cari tədris ilində qeyd olunan nöqsanların nəzarətdə saxlanması məqsədilə yeni mexanizmlər müəyyənləşdirilib".