Prezidentin Dini Azadlıq Komissiyası bazar ertəsi üçüncü dinləməsini keçirərək ictimai təhsildə dini azadlıq məsələlərinə diqqət yetirib. Dinləmədə müxtəlif sahələrdən olan müəllimlər, məşqçilər və ailələr öz təcrübələrini bölüşüblər.
“Tehsil365” “First Liberty”ə istinadən xəbər verir ki, baş müşavir Keisha Russell dövlət məktəblərində dini ifadələrə qarşı təzyiqlər barədə danışaraq, müəllimlərin və şagirdlərin dua və inanc azadlıqlarının məhdudlaşdırıldığını qeyd edib.
Dinləmədə, həmçinin ABŞ Ali Məhkəməsində dini azadlıqlar uğrunda tarixi qələbə qazanan məşqçi Joe Kennedy iştirak edib. O, hər oyun sonrası qısa dua etdiyinə görə işindən uzaqlaşdırıldığını və bu səbəbdən illərlə hüquqi mübarizə apardığını bildirib.
Konnektikutdan olan müəllim Marisol Castro isə iş yerində masasında çarmıx saxladığı üçün ayrı-seçkiliyə məruz qaldığını deyib. O, 30 illik nümunəvi xidmətinə baxmayaraq, işdən uzaqlaşdırıldığını və haqlarını məhkəmə yolu ilə müdafiə etdiyini bildirib.
Bangor Xristian Məktəbinin nümayəndəsi Carroll Conley Men ştatında dini məktəblərə qarşı maliyyə ayrı-seçkiliyini diqqətə çatdırıb. O, Ali Məhkəmənin dini məktəblərə qarşı bərabər davranılmalı olduğunu qərara aldığını, lakin bəzi ştatların bu qərara əməl etmədiyini bildirib.
First Liberty təşkilatının prezidenti Kelly Shackelford vurğulayıb ki, müəllimlərin və inanca əsaslanan məktəblərin hüquqlarının qorunması gələcək nəsillər üçün mühüm əhəmiyyət daşıyır.
Keisha Russell isə qeyd edib ki, Komissiyanın tövsiyələri ABŞ Konstitusiyasına hörməti və dini azadlıqların müdafiəsini gücləndirəcək.