Son illərdə şagird və tələbələr arasında “imtahan qorxusu”nun artdığı müşahidə olunur. Psixoloqlar bu halı akademik təzyiq, uğursuzluq qorxusu və sosial müqayisə ilə əlaqələndirirlər. Uşaqlıqdan valideyn və müəllim tərəfindən yüksək gözləntilərlə qarşılaşan gənclər, imtahanı həyatlarının ən vacib dönüm nöqtəsi kimi görür və bu da onlarda narahatlıq yaradır.
“Tehsil365” xəbər verir ki, təhsil mütəxəssislərinin fikrincə, imtahan öncəsi yaranan stress normal hal olsa da, davamlı gərginlik diqqət və yaddaşa mənfi təsir göstərə bilər. Psixoloq Aygül Əliyeva bildirir ki, gənclər çox zaman imtahan nəticəsini şəxsiyyətlərinin göstəricisi kimi qəbul edir, bu isə onların özünəinamını zədələyir. Onun sözlərinə görə, bu psixoloji baryerin aradan qaldırılması üçün həm ailə, həm də müəllimlər emosional dəstək verməlidirlər.
Mütəxəssislər tövsiyə edir ki, imtahana hazırlıq zamanı balanslı gündəlik rejim qurmaq, mütəmadi fasilələr vermək və düzgün nəfəs texnikalarından istifadə etmək faydalıdır. Həmçinin, real hədəflər qoymaq və özünü digərləri ilə müqayisə etməmək gənclərin özünəinamını artırır. İmtahanı həyatın sonu kimi deyil, sadəcə bir mərhələ kimi qəbul etmək bu qorxunun azalmasına kömək edir.