17 oktyabr 2025-ci il tarixdə Şirvan-Salyan Regional Gənclər və İdman İdarəsi, Şirvan Şəhər İcra Hakimiyyəti və Şirvan şəhər Polis Şöbəsinin birgə təşkilatçılığı ilə Şirvan şəhər E.İmanov adına 10 nömrəli tam orta məktəbdə “Sağlam mühit və sağlam gələcək naminə narkotikdən uzaq olaq” adlı maarifləndirici görüş keçirildi.
“Tehsil365” xəbər verir ki, tədbirdə çıxış edən Şirvan-Salyan Regional Gənclər və İdman İdarəsinin Gənclərlə İş Sektorunun müdiri Samit Həsənov qeyd etdi ki, Azərbaycan Respublikasının Prezidenti İlham Əliyevin 17 sentyabr 2025-ci il Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2025–2030-cu illər üçün Dövlət Proqramı” təsdiq edilib. Şirvan-Salyan Regional Gənclər və İdman İdarəsi, Şirvan şəhər İcra Hakimiyyəti və Şirvan Şəhər Polis Şöbəsi ilə birgə narkomanlığa qarşı mübarizəyə dair 2025–2030-cu illər üçün Dövlət Proqramının icrası istiqamətində bundan sonra da yeniyetmə və gəncləri zərərli vərdişlərdən uzaqlaşdırmaq, onlar arasında sağlam həyat tərzinin təbliği və maarifləndirmə işinin genişləndirilməsi məqsədi ilə maarifləndirici tədbirlər keçiriləcəkdir.
Şirvan şəhər İcra Hakimiyyətinin İctimai-siyasi və humanitar məsələlər şöbəsinin müdir müavini Rafael Nəsirov çıxışında bildirdi ki, narkomaniya və narkotik maddələrin qeyri-qanuni dövriyyəsinə qarşı mübarizədə dövlət qurumları ilə bərabər cəmiyyət də aktiv iştirak etməlidir. Narkomaniya ilə mübarizə sahəsində dövlət siyasətinin strateji istiqamətlərini müəyyən edən bir sıra Qanun və Dövlət Proqramları bütün ölkədə olduğu kimi şəhərimizdə də uğurla həyata keçirilir.
Şirvan şəhər Polis Şöbəsinin yetkinlik yaşına çatmayanlar üzrə baş inspektoru, polis leytenantı Murad Baxşıyev Şirvan şəhərində narkotik vasitələrin qanunsuz dövriyyəsi və satışı ilə məşğul olan şəxslərə qarşı qətiyyətli tədbirlər görüldüyünü, bu cinayət əməli ilə məşğul olan hər bir şəxs polis əməkdaşları tərəfindən saxlanılaraq məsuliyyətə cəlb edildiyini qeyd etdi.Daha sonra Rafael Nəsirov və Murad Baxşıyev tədbir iştirakçılarını maraqlandıran sualları cavablandırdılar.Sonda “Narkotikə yox deyək!” adlı qısa video çarx nümayiş olundu.