Elm və Təhsil Nazirliyinin Dendrologiya İnstitutunun Ağac-kolların introduksiyası və iqlimləşdirilməsi laboratoriyasının əməkdaşları Saray təcrübə sahəsində tədqiqat işləri aparıblar.
İnstitutdan “Tehsil365"ə bildirilib ki, işin əsas məqsədi sahədə introduksiya olunan bitki növlərinin inkişaf dinamikasını izləmək və payız mövsümü üçün planlaşdırılan elmi-proqram tapşırıqlarının icra vəziyyətini qiymətləndirmək olub.
Təcrübə sahəsində əməkdaşlar tərəfindən ağac və kol bitkilərinin vegetativ vəziyyəti, torpaq və iqlim amillərinin təsiri, eləcə də adaptasiya proseslərinin gedişi ilə bağlı elmi müşahidələr aparılıb. Əldə olunan nəticələr sonrakı tədqiqatlarda istifadə olunacaq.
Laboratoriyanın əməkdaşı elmi işçi Nuray Qədirova Saray təcrübə sahəsində Cillis sezalpiniya (Caesalpinia gillisii Walt) bitkisi üzərində tədqiqat işi aparıb. Bitkinin inkişaf mərhələsində bioekoloji xüsusiyyətləri, fenologiya, morfologiya inkişaf dinamikası və yerli şəraitə uyğunlaşması öyrənilib.
Uzunömürlü, quraqlığadavamlı, isti və işıqsevən bitki hər il çiçəkləyir və meyvə verir. Dekorativ görünüşə malik olduğundan onun Abşeron ərazisinin yaşıllaşdırılmasında istifadəsi məqsədəuyğundur.
