“Tehsil365” ARTİ-yə istinadən xəbər verir ki, Təhsil İnstitutunun Həmkarlar İttifaqı tərəfindən yeniyetmə və gənclər arasında narkomaniyaya qarşı mübarizə məqsədilə təbliğat və maarifləndirmə işinin təşkili istiqamətində maarifləndirici tədbir həyata keçirilib. Tədbirin əsas məqsədi pedaqoji kollektivdə narkomaniya ilə bağlı maarifləndirmə aparmaq, asılılıq risklərinin erkən müəyyənləşdirilməsi və profilaktik tədbirlərin gücləndirilməsi istiqamətində bilik və bacarıqları artırmaq olub. Tədbirdə Məktəbin İnkişaf Planı (MİP) çərçivəsində fəaliyyət göstərən 227, 242 və 154 nömrəli tam orta məktəblərin müəllim heyəti iştirak edib. İştirakçılar narkomaniyanın qarşısının alınması üzrə pedaqoji yanaşmalar, məktəbdaxili psixoloji dəstək mexanizmləri və şagirdlərlə effektiv kommunikasiya üsulları barədə faydalı məlumatlar əldə ediblər.
Tədbirdə ARTİ-nin Təhsilin iqtisadiyyatı və idarə olunması şöbəsinin aparıcı elmi işçisi, psixologiya üzrə fəlsəfə doktoru Bahar Bəylərova-Ələkbərova təqdimatla çıxış edib. Seminar çərçivəsində narkomaniya ilə bağlı bilik və davranışların formalaşması, erkən yeniyetməlik və yeniyetməlik dövrlərinin psixofizioloji və fərdi xüsusiyyətlərinin nəzərə alınması, asılılığın psixoloji aspektləri, narkotik və psixotrop maddələrin, eləcə də onların prekursorlarının insan orqanizminə göstərdiyi psixofizioloji təsirlər, həmçinin sinifdə sağlam psixoloji-emosional mühitin formalaşdırılmasının əhəmiyyəti kimi mövzulara toxunulub.
Tədbirin sonunda fərdi inkişaf üçün kitab tövsiyələri verilib, iştirakçıların sualları cavablandırılıb və mövzu ilə bağlı fikir mübadiləsi aparılıb.