4 noyabr 2025-ci il tarixində Dövlət İmtahan Mərkəzində fəaliyyətini başa çatdıran bir qrup könüllüyə sertifikat təqdim olunub.
“Tehsil365" xəbər verir ki, görüşdə çıxış edən Dövlət İmtahan Mərkəzinin İdarə Heyətinin sədrinin müavini Namiq Babayev könüllü fəaliyyətini başa vuran gəncləri təbrik edərək onlara öz təşəkkürünü bildirib və gələcək fəaliyyətlərində uğurlar arzulayıb. N.Babayev gənclərə real iş mühitində praktiki bacarıqların inkişaf etdirilməsi, doğru qərarların verilməsi, planlaşdırma, şəxsi potensialın düzgün istiqamətdə inkişaf etdirilməsi ilə bağlı tövsiyələrini verib.
Daha sonra könüllülər də çıxış edərək DİM-də təcrübə keçmələri üçün yaradılmış şəraitə görə öz minnətdarlıqlarını bildirib və bu təcrübənin onların gələcək fəaliyyətində mühüm əhəmiyyət kəsb etdiyini qeyd ediblər.
Tədbirin sonunda 211 könüllüyə müvafiq sertifikatlar təqdim olunub.
Qeyd edək ki, Dövlət İmtahan Mərkəzi könüllülər layihəsinə 2024-cü il noyabr ayından start verib.
Müəyyən seçim mərhələlərini uğurla başa vuran könüllülər Dövlət İmtahan Mərkəzinin fəaliyyət istiqamətlərinə və öz istəklərinə uyğun İmtahanların təşkili və idarəedilməsi, Statistik araşdırmalar, elmi layihələşdirmə və innovasiyalar, E-imtahanlar və müsahibələrin təşkili, Hüquqi təminat, dövlət qulluğu məsələləri və dövlət strategiyaları ilə iş, İctimaiyyətlə əlaqələr və kargüzarlıq departamentlərində, həmçinin İnsan resurslarının idarə edilməsi şöbəsində müxtəlif proseslərə cəlb edilirlər.
Bu layihənin əsas məqsədi gənclərin peşəkar vərdişlərinin formalaşmasına dəstək vermək, onları Dövlət İmtahan Mərkəzinin fəaliyyəti ilə yaxından tanış etmək və gələcəkdə karyera planlamasına təkan verməkdir.