AMEA-nın 80 illik yubileyi həm keçilən elmi yolun dəyərləndirilməsi, həm də gələcəyə yönəlik strateji baxış mərhələsidir. Bu mərhələ elmi ənənələrin qorunması ilə yanaşı, idarəetmə və tətbiq mexanizmlərinin yenilənməsini, elmin dövlət və cəmiyyət həyatında rolunun gücləndirilməsini zəruri edir.
“Tehsil365" xəbər verir ki, bunu Beynəlxalq Türk Akademiyasının prezidenti akademik Şahin Mustafayev AMEA-nın Rəyasət Heyətində Akademiyanın 80 illik yubiley tədbirinin İkinci sessiyasında çıxışı zamanı söyləyib.
Alim bildirib ki, AMEA-nın 80 illik tarixi - Azərbaycan xalqının zəngin intellektual potensialını, elmi düşüncə mədəniyyətini və milli inkişaf strategiyasını özündə cəmləşdirən böyük bir elmi irsdir. Bu illər ərzində Akademiyanın fəaliyyəti elmin prioritet istiqamətlərində tədqiqatların aparılması, yüksəkixtisaslı kadrların yetişdirilməsi, mühüm layihələrin həyata keçirilməsi, elmi məktəblərin formalaşdırılması və beynəlxalq əməkdaşlığın genişləndirilməsi prinsipləri üzərində qurulub.
Akademiyanın inkişafının mənəvi və ideoloji təməlinin XIX əsrin sonu Azərbaycan maarifçiliyinə dayandığını söyləyən akademik Şahin Mustafayev Həsən bəy Zərdabinin elmə və maarifə çağırışı, Mirzə Fətəli Axundzadənin rasional düşüncə fəlsəfəsi və digər mütəfəkkirlərimizin milli mədəniyyət və elm birliyi haqqında ideyalarının milli elmi təfəkkürün formalaşmasında mühüm rol oynadığını qeyd edib: “Bu mənada AMEA yalnız elmi təşkilat deyil - maarifçilik ideyalarının institutlaşmış davamı, milli elmi düşüncənin daşıyıcısı və varislik prinsipinin canlı təcəssümüdür”.
O, Azərbaycan elminin ötən əsrin 70-ci illərindəki inkişafı dövründə elmi idarəetmə sisteminin təkmilləşdirilməsi, tədqiqat istiqamətlərinin genişləndirilməsi və elmi potensialın qorunmasının mühüm prioritetlərdən birinə çevrildiyini deyib. Bildirib ki, bu mərhələ elmin ölkənin sosial-iqtisadi və mədəni yüksəlişində aparıcı rol oynamasının əsasını qoyub.
Akademik Şahin Mustafayev türk dövlətlərinin elmi qurumları arasında koordinasiya və əməkdaşlıq funksiyasını yerinə yetirən Beynəlxalq Türk Akademiyasının AMEA ilə münasibətlərinə də toxunub. Bu qurum tərəfindən həyata keçirilən beynəlxalq layihələrdə Akademiyanın institutları və aparıcı alimlərinin fəal iştirakını yüksək qiymətləndirib.
O, AMEA-nın 80 illik yubiley tədbirləri çərçivəsində keçiriləcək Türk Dünyası Milli Elmlər Akademiyaları Birliyinin VIII Assambleyasının Türk dünyasında elmi əməkdaşlığın daha da möhkəmləndirilməsi, qarşılıqlı elmi əlaqələrin institusional əsasda dərinləşdirilməsi və ortaq elmi məkanın inkişafı baxımından böyük əhəmiyyət daşıdığını diqqətə çatdırıb.
Həm texniki, həm də humanitar elmlərin qarşısında müasir dövrün tələblərinə cavab verən mühüm vəzifələrin dayandığını söyləyən alim AMEA-nın bu prosesdə elmi fəaliyyətin istiqamətverici mərkəzi kimi çıxış edərək, ölkənin intellektual potensialının inkişafına mühüm töhfə verəcəyinə inamını ifadə edib.