Əgər bütün qapılar üzünə bağlanırsa, öz qapını yarat

Barbara Korcoran bu gün “Shark Tank” proqramında minlərlə sahibkara ilham verən tanınmış investor, mentor və biznes simasıdır.

“Tehsil365” xəbər verir ki, amma onun uğur hekayəsi heç də rahat yoldan keçməyib.

1949-cu ildə Nyu-Cersidə sadə işçi ailəsində doğulan Barbara on uşaqlı ailənin ikinci övladı idi. Məktəb illəri asan keçmirdi, oxumaqda çətinlik çəkirdi və çox vaxt sinifdə zəif qiymətlər alırdı. O, sonradan etiraf edirdi ki, disleksiya səbəbindən müəllimlər onun uğurlu ola biləcəyinə inanmırdılar. Amma məhz o inamsızlıq gələcəkdə onun ən böyük motivasiyasına çevrildi.

Gənclik illərində Barbara 20-dən çox fərqli işdə çalışdı - ofisiantlıqdan tutmuş, kassirliyə qədər. Hər işdən bir dərs aldı, insan psixologiyasını, müştəri davranışını və inandırmaq bacarığını öyrəndi. Bu təcrübələr sonradan onun biznes fəlsəfəsinin əsasına çevrildi.

1973-cü ildə o, yalnız 1000 dollar borc alaraq Nyu-Yorkda kiçik daşınmaz əmlak şirkəti qurdu. “The Corcoran Group” adlanan bu firma əvvəlcə kiçik ofis kimi fəaliyyət göstərsə də, Barbara müştərilərlə səmimi münasibəti, sadə, amma diqqət çəkən reklam yanaşması ilə bazarda fərqləndi. O, deyirdi ki, “əgər bütün qapılar üzünə bağlanırsa, öz qapını yarat”.

Bu inamla qurduğu şirkət illər keçdikcə Nyu-Yorkun ən nüfuzlu daşınmaz əmlak brendlərindən birinə çevrildi. 2001-ci ildə Barbara şirkətini 66 milyon dollara satdı və o vaxtdan etibarən biznes dünyasında nüfuzlu ad kimi tanındı.

Lakin o, burada dayanmadı. Tezliklə “Shark Tank” proqramında investor kimi çıxış etməyə başladı və öz təcrübəsini paylaşmaqla yüzlərlə sahibkara yol göstərdi. Eyni zamanda kitablar yazdı, qadın liderliyi və sahibkarlıq mövzusunda çıxışlar etdi.

Barbara Korcoran bu gün də uğurun əsas amili kimi sadəliyi, inamı və risk etməyi göstərir. Onun sözləri ilə desək, “insan səni rədd edəndə, sənə dərs verir”. Uşaqlıqda yaşadığı çətinlikləri gücə çevirən Barbara bu gün öz hekayəsini minlərlə insana ilham qaynağı kimi bölüşür.