3–7 noyabr 2025-ci il tarixlərində Dövlət İmtahan Mərkəzində (DİM) müxtəlif fənlər üzrə seminarlar keçirilib.
“Tehsil365” DİM-in məlumatına əsasən xəbər verir ki, 3 noyabrda Azərbaycan dili fənni üzrə seminarda tam orta (11 illik) təhsil səviyyəsi üzrə buraxılış imtahanı proqramı müzakirə edilərək təsdiq olunub. Təkliflər nəzərə alınmaqla proqramda redaktə xarakterli düzəlişlər aparılıb. Həmin gün informatika fənni üzrə seminarda qəbul imtahanı modelinə uyğun tapşırıq nümunələri təhlil edilib və tələblərə cavab verənlər qəbul olunub.
4 noyabrda kimya fənni üzrə seminarda I və IV ixtisas qruplarına aid ali təhsil müəssisələrinə qəbul imtahanı proqramı yekunlaşdırılaraq təsdiqlənib.
5 noyabrda fizika və rus dili fənləri üzrə keçirilən seminarlarda imtahan modellərinə uyğun tapşırıq nümunələri müzakirə edilib. Məzmunun dərsliklərlə uyğunluğu, mövzu və mürəkkəblik dərəcəsi qiymətləndirilib, uyğun tapşırıqlar qəbul olunub.
6 noyabrda biologiya və tarix fənləri üzrə, 7 noyabrda isə coğrafiya və riyaziyyat fənləri üzrə seminarlar təşkil olunub. Biologiya və tarix fənlərində tapşırıqların uyğunluğu və dərəcələri müəyyənləşdirilib. Coğrafiya üzrə tapşırıqlar təhlil edilib, riyaziyyat fənni üzrə isə tam orta təhsil səviyyəsinə aid imtahan proqramı müzakirə edilərək təsdiq olunub.
Seminarlarda orta ümumtəhsil və ali təhsil müəssisələrinin müəllimləri, metodistlər, Azərbaycan Milli Elmlər Akademiyası və Elm və Təhsil Nazirliyinin tabeliyindəki institutların mütəxəssisləri iştirak ediblər. Eyni zamanda DİM-in Naxçıvan, Gəncə, Şirvan, Lənkəran, Şəki, Bərdə, Xaçmaz, Şəmkir və Göyçay regional bölmələrindən müəllimlər onlayn qaydada müzakirələrə qoşulublar.
Seminarlarda fəal iştirak edən müəllimlər arasında Qazax, Şəki, Naxçıvan, Göygöl, Daşkəsən, Astara, Gəncə və Ordubad rayonlarından pedaqoqlar yer alıblar.
Seminar iştirakçıları 8 Noyabr – Zəfər Günü münasibətilə xalqımızı təbrik edib, şəhidlərə rəhmət, qazilərə can sağlığı arzulayıblar.
Qeyd edək ki, təsdiq edilmiş buraxılış və qəbul imtahanı proqramları, eləcə də imtahan modellərinə uyğun tapşırıq nümunələri “Abituriyent” jurnalının növbəti saylarında dərc ediləcək. Müzakirələr gələn həftə də davam etdiriləcək.