Göyçay narının qiymətləri bu mövsüm də mübahisələrə səbəb olub. Hazırda bazarda meyvənin kiloqramı 3-10 manat arasında dəyişir. Bəziləri təklif edilən rəqəmin yüksək olduğunu desə də, Göyçay rayon icra başçısının müavini Zivər Zeynalovun izahatı diqqət çəkib.
Sitat: “Bu, Göyçay narıdır, dadı və keyfiyyəti başqadır”.
Mövcud açıqlama isə sosial şəbəkələrdə geniş müzakirələrə yol açıb. Ölkədə istehsal edilən məhsulun bu qədər baha satılması narazılıq yaradıb.
“Tehsil365”-ə danışan iqtisadçı Fuad İbrahimov deyib ki, qiymət hər zaman tələbat və alıcının imkanlarına görə formalaşır:
“Məsələn, Göyçayın “Bığır narı” kimi sortlar Rusiyanın ən geniş istehlak bazarına çıxarılır və bəzi hallarda mövsümün əvvəlindən məhsul alınır. Bu zaman bazarda defisit yaranır və yüksək qiymətlər müşahidə edilir. Əgər həmin sort başqa yerlərdə də əkilərsə və bolluq yaranarsa, qiymət enəcək. Yəni brendin, sortun qıtlığı qiymətin bahalaşmasına səbəb olur”.
Bakıda kilosu 10 manata satılan meyvə mübahisə yaratdı - Bilinməyənlər
Fuad İbrahimov
İqtisadçı bildirib ki, hazırda mövcud bahalaşma prosesi bazar iqtisadiyyatı prinsiplərinə tamamilə uyğundur:
“Məsələn, dünyada balığın qara kürüsünün bir kiloqramı xarici bazarda 4-7 min dollar arasında satılır. Biz onun ucuz olmasını istəsək də, biznesmen məhsulu daxili bazarda 1000 manata satacaqmı?! Ərzaq məhsulu olmayan brendlər də eyni prinsip üzrə işləyir – marka artıq əlavə dəyər gətirir və qiymət buna uyğun formalaşır”.
Ekspert vurğulayıb ki, məhsulun bolluğu önəmli faktordur:
“Bazarda başqa problemlər də mövcuddur. Məsələn, məhsulun bazara daxil olması ilə bağlı çətinliklər var. Şəhərin mərkəzində nar və digər meyvələrin qiyməti çox yüksəkdir. Hətta bazarda pomidor da 2-3 manata satılır. Halbuki rayonlarda bu, 50-70 qəpiyə satışa çıxarılır. Bazarda inhisarçılıq halları kifayət qədərdir və bu, məhsulun qiymətinin dayanıqlı şəkildə yüksək qalmasına yol açır. Əgər inhisarçılıq elementi olmasa, sahibkar rahatlıqla Göyçaydan məhsulu götürüb Bakıya gətirə bilər və qiymət hazırkı səviyyədə olmaz”
