Müasir Azərbaycan ədəbiyyatında öz fərqli üslubu və dərin psixoloji təsviri ilə seçilən yazarlardan biri də Rəvanə Kərimovadır.
“Tehsil365” xəbər verir ki, O, Azərbaycan Dillər Universitetinin Beynəlxalq Münasibətlər fakültəsini bitirib, uzun illərdir yazarlıqla məşğuldur. Musiqi sahəsində də bacarığı olan müəllif, həmçinin peşəkar piano ifaçısı və keçmişdə taekvondo ilə də ciddi şəkildə maraqlanmış bir şəxsdir.
Onun qələmə aldığı “Qanlı Qədəh” romanı oxucular tərəfindən həm bədii dili, həm də quruluş baxımından maraqla qarşılanıb. Əsərin əsasında dərin travmalar, yaddaş itkisi, reallıqla illüziya arasındakı incə xətt və psixoloji gerilim dayanır. Müəllif deyir ki, bu əsəri yazmaq qərarına yaxın bir insanının vəfatı səbəb olub: “2017-ci ilin sentyabrında bir yaxınımı itirdim. Həmin gün 'Qanlı Qədəh'in təməli atıldı, amma illərlə yazmağa cəsarət edə bilmədim.”
Kitabda verilən “heç kimə inanma, hamıdan şübhələn” mesajı müəllifin fikrincə birbaşa oxucuya ünvanlanıb:
“Açıq şəkildə oxucuya kitabdakı hər bir obraza şübhə ilə yanaşmaqlarını deyirəm. Çünki, həqiqətən də elədir. Obrazlar çox məqsədyönlü şəkildə daxil olublar bir-birlərinin həyatlarına. Oxucu bunu bölümlər irəlilədikcə daha yaxşı anlayacaq.”
Əsərdəki hadisələrin əsasən real məkanlara əsaslandığını deyən Rəvanə Kərimova qeyd edir ki, o, yazarkən məkana xüsusi diqqət yetirib:
“Məkan anlayışını araşdıraraq, əlimdən gəldiyi qədər real məkanlar üzərində yazmağa çalışıram.”
Romanın davamı və ikinci hissəsinin olub-olmayacağı ilə bağlı isə müəllif bu fikrə qapalı yanaşır:
“Heç sanmıram. Bu artıq yersiz yerə uzatma olar. Onların başlanğıcı və sonu təxəyyülümdə əvvəlcədən ölçülüb-biçilib.”
“Qanlı Qədəh” sadəcə bir psixoloji triller deyil, yaddaş, zaman və insan təbiətinin qaranlıq tərəflərini araşdıran dərin məzmunlu bir əsərdir. Oxucuya daim sual etdirən, cavablar verdikcə yeni suallara yol açan bu roman Azərbaycan müasir ədəbiyyatında maraqlı izlər buraxmağa namizəddir.