Azərbaycan Mətbuat Şurasında “Yeni təfəkkür” qəzetinin təsisçisi və baş redaktoru, Əməkdar jurnalisti Şəmsiyyə Kərimovanın 70 illik yubileyi ilə bağlı toplantı keçirilib.
“Tehsil365” xəbər verir ki, Mətbuat Şurasının sədri Rəşad Məcid Şəmsiyyə Kərimovanın keçdiyi yaradıcılıq yolunu xatırladaraq bildirib ki, Bakı Dövlət Universitetinin jurnalistika fakültəsini bitirdikdən sonra o, Azərbaycan Dövlət Radio və Televiziya Verilişləri Komitəsində radionun “Gənclik” baş redaksiyasında müxbir kimi fəaliyyətə başlayıb, “Azərbaycan gəncləri” qəzetində, müstəqillik illərində “İki sahil” və “Naxçıvan” qəzetlərində də çalışıb.
2005-ci ildə isə Şəmsiyyə Kərimova “Yeni təfəkkür” qəzetini təsis edib və nəşrin baş redaktoru olub. Onun rəhbərlik etdiyi qəzet Azərbaycan Qızıl Aypara Cəmiyyətinin həmtəsisçiliyi ilə öz fəaliyyətini davam etdirir. Ona Mətbuat Şurasının diplomu təqdim edilib.
Ahıl Jurnalistlər Məclisinin sədri, “Xalq qəzeti”nin baş redaktor müavini Tahir Aydınoğlu, “Şöhrət” ordenli jurnalist Flora Xəlilzadə, Əməkdar jurnalistlər Zemfira Məhərrəmli, Əntiqə Qonaq, İttifaq Mirzəbəyli, Qafar Əsgərzadə, “Yada düşdü” jurnalının baş redaktoru Nəzakət Məmmədova və başqaları Şəmsiyyə Kərimovanın peşə fəaliyyəti ilə bağlı ürək sözlərini söyləyib, xatirələrini bölüşüblər. Qeyd olunub ki. “Yeni təfəkkür” qəzeti respublikanın həyatında baş verən ictimai-siyasi proseslərə obyektiv yanaşır və öz missiyasını uğurla yerinə yetirir.
Çıxış edənlər onun təkcə jurnalistlik deyil, eyni zamanda, bədii-publisistik fəaliyyəti barədə də bəhs ediblər. İndiyədək onun “Şəmsiyyənin kitabı” və “Özüm, sözüm, izim” adlı kitabları nəşr olunub. Ş.Kərimova bir neçə başqa kitabların da redaktorudur.
Toplantıda Milli Məclisin İctimai Birliklər və Dini Qurumlar Komitəsinin eksperti Əkbər Qoşalı Ş.Kərimovaya komitə sədri Fazil Mustafanın təbrik məktubunu təqdim edib.
Mərasimin yekununda Ş.Kəriumova xoş sözlərə görə toplantı iştirakçılarına təşəkkürünü bildirib.
