Bu gün – 28 noyabr – görkəmli publisist, pedaqoq, maarifçi-demokrat və Azərbaycan milli mətbuatının banisi Həsən bəy Zərdabinin vəfatının ildönümüdür.
"Tehsil365" xəbər verir ki, O, 1907-ci ilin məhz bu günündə – Bakıda dünyasını dəyişib.
1837-ci ildə Göyçay qəzasının Zərdab kəndində anadan olan Həsən bəy Zərdabi (Məlikov) təkcə bir mətbuat nümayəndəsi deyil, həm də cəmiyyətin maariflənməsi və elmə yiyələnməsi uğrunda yorulmadan çalışan böyük ziyalı idi.
Həsən bəy Zərdabi 1875-ci ildə Azərbaycanda və ümumilikdə müsəlman Şərqində ilk dəfə olaraq “Əkinçi” qəzetini təsis edərək redaktoru olmuş, milli mətbuatın əsasını qoymuşdur. “Əkinçi” vasitəsilə xalqı maarifləndirməyə, elmə və təhsilə cəlb etməyə çalışmış, savadsızlıq və cəhalətə qarşı ciddi mübarizə aparmışdır.
Zərdabi həm də təbiət elmləri sahəsində ixtisaslaşmış ilk azərbaycanlılardan biri idi. O, darvinizmin ideyalarını müdafiə etmiş, biologiya və ekologiya sahəsində elmi təbliğata önəm vermişdir.
Maarifçilik fəaliyyəti ilə paralel olaraq, qadınların təhsil hüququ, kənd uşaqlarının maariflənməsi və ana dilində təhsilin vacibliyi kimi mövzularda dövrünün qabaqcıl ideyalarını müdafiə etmişdir.
Həsən bəy Zərdabinin zəhməti nəticəsində sonrakı illərdə Azərbaycanda onlarla qəzet və jurnal nəşr olunmağa başladı, mətbuat cəmiyyətdə ciddi fikir tribunası və maarif ocağına çevrildi.
Onun ideyaları bu gün də öz aktuallığını qoruyur. Həsən bəy Zərdabi Azərbaycan ziyalılığının, jurnalistikasının və maarifçiliyinin rəmzlərindən biridir.
Əziz xatirəsi dərin ehtiramla yad olunur.