Son günlər ictimai nəqliyyat yaxınlığında və şəhərin müxtəlif küçələrində azyaşlıların dilənməyə cəlb olunması ilə bağlı müşahidələr artıb.
Məsələ ilə əlaqədar Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin böyük məsləhətçisi Cəfərova Şəbnəm “Tehsil365”ə geniş açıqlama verib.
Cəfərova Şəbnəm qeyd edib ki:
“Hazırda yaşadığımız cəmiyyətdə, eyni zamanda bütün dünyada küçə uşaqları, qaraçı tayfasına mənsub ailələr tərəfindən uşaqların diləndirilməsi halları müşahidə olunur. Təbiiki, burada hər bir dövlət qurumu öz fəaliyyət istiqamətinə uyğun olaraq iş həyata keçirir. Bu sahədə mütəmadi olaraq profilaktika işləri aparılır. Bəzi hallarda isə təəssüflər olsun ki, valideyn məsuliyyətsizliyi, yaxud valideynlər tərəfindən bilərəkdən uşaqları küçə həyatına məruz qalır.”
O əlavə edib ki:
“Burada uşağın ən təməl hüquqlarının pozulması məsələsi birinci növbədə araşdırılması vacib olan məqamdır. Beləki, uşağın mənsub olduğu ailə burada qiymətləndirilir, uşağın sənədləri varmı-yoxmu, məktəbə gedirmi, təhsildən yayınmasına səbəb olan amil, digər bacı-qardaşı varmı, onlarda bu kimi fəaliyyətlərə cəlb olunurmu, eyni zamanda onlar valideynləri tərəfindən buna məcbur edilib, yaxud qeyri-rəsmi himayəsində yaşadıqları şəxs tərəfindən və s. tipli bütün məsələlər araşdırılır.”
Əlavə olaraq, məsləhətçi bildirib ki:
“artıq araşdırma gedişatında uşağın mənəviyyatına, sağlamlığına və həyatına zidd olan fəaliyyət aşkar edilərsə, Ailə Məcəlləsinə uyğun olaraq uşağın ailədən götürülməsi məsələsi həyata keçirilir. Bundan sonra uşaq yerləşdirildiyi müəssisəsəyə uyğun olaraq, həm reabilitasiyaya cəlb edilir, həm də onunla bağlı digər hüquqi prosedurlar yerinə yetirilir.”
Sonda Cəfərova Şəbnəm vurğulayıb ki:
“Hər zaman bu kimi həssas mövzuda valideynlərin öz məsuliyyətini dərk etməsi vacibdir. Hər bir valideyn bilməlidir ki, uşaqlarını tərbiyə etmək, onların qayğısına qalmaq valideynlərin borcudur. Bu borcun yerinə yetirilməsinə dövlət nəzarət edir. Ailə Məcəlləsinə uyğun olaraq, valideynlər hansı bir halda övladına qarşı öhdəliklərini yerinə yetirməzlərsə, bu məsələyə müvafiq hüquqi aktlara uyğun olaraq qiymət verilir.”