Noyabrın 27-də ADU-da Elmi şuranın növbəti iclası keçirilib.
“Tehsil365” bildirir ki, ADU-nun rektoru, akademik Kamal Abdulla şura üzvlərini salamlayıb, cari və qarşıda duran məsələlər haqqında danışıb.
Qeyd olunub ki, ADU-da tədrisin təşkili, maddi-texniki təminat, beynəlxalq əlaqələrin qurulması istiqamətində bir sıra ciddi uğurlara imza atılıb.
Professor A.A.Umnyaşkin tərəfindən ADU-nun Elmi kitabxanasına hədiyyə olunan kitablara görə təşəkkür məktubunun göndərilməsi haqqında qərar qəbul edilib.
Ümumi dilçilik kafedrasının müdiri, professor Azad Məmmədov, Strateji inkişaf və planlama şöbəsinin müdiri Röya Əliyeva hesabatla çıxış ediblər.
Bildirilib ki, son bir ildə şöbə və kafedra qarşısında qoyulan vəzifələrin icrası yüksək səviyyədə həyata keçirilib. Beynəlxalq əməkdaşlıq və akademik fəaliyyətlə bağlı yeni perspektivlər haqqında məlumat verilib.
Beynəlxalq əlaqələr üzrə prorektor, professor Jalə Qəribova Macarıstanda “Azərbaycan dili və mədəniyyəti” mərkəzinin fəaliyyəti və ADU-nun xarci ölkələrdə fəaliyyət göstərən mərkəzlərinin işinin əlaqələndirilməsi ilə bağlı Məşvərət Şurasının yaradılması və Əsasnaməsinin təsdiq olunması haqqında məlumat verib.
Qeyd olunub ki, ADU-nun dünyanın səkkiz ölkəsində fəaliyyət göstərən dil və mədəniyyət mərkəzləri uğurla işlərini davam etdirir. Ezam olunan peşəkar əməkdaşlar və mütəxəssislər ölkənin dil və mədəniyyətinin tanıdılması və təbliğində mühüm rola oynayırlar.
Elmi işlər üzrə prorektor, professor Həmidə Əliyeva ADU-da 21 noyabr 2025-ci il tarixində keçirilmiş “Süni intellekt və humanitar elmlər; müasir vəziyyət və perspektivlər” adlı Beynəlxalq konfransın yekun nəticələri haqqında məlumat verib.
Qeyd olunub ki, konfransda on beş ölkədən olan alimlər, mütəxəssislər iştirak edib, həmçinin səfirlər, diplomatlar və gənc mütəxəssislər konfransa öz maraq və diqqətini ən yüksək səviyyədə göstəriblər.
ADU HİK sədri, dosent Misgər Məmmədov Kollektiv müqavilənin imzalanması haqqında danışıb. Müqaviləni ADU-nun rektoru, akademik Kamal Abdulla imzalayıb.
Elmi şura çapa tövsiyələrlə davam edib.