Hər il 1 dekabr tarixində Ümumdünya QİÇS-lə Mübarizə Günü qeyd olunur. QİÇS və İİV-infeksiyası dünya səhiyyəsinin ən ciddi infeksion problemlərindən biri olaraq qalmaqdadır. Hazırda dünyada təxminən 40 milyon insanın İİV daşıyıcısı olduğu bildirilir. Qazanılmış İmmun Çatışmazlığı Sindromu insanın sonradan yoluxa bildiyi və nəticələri ağır olan bir xəstəlikdir. Bir sıra Avropa ölkələrində QİÇS-lə yaşayan insanların vəziyyətinin yaxşılaşdırılması, cəmiyyətin onlara münasibətinin dəyişdirilməsi üçün geniş tədbirlər həyata keçirilir, tibbi və sosial dəstək göstərilir.
"Tehsil365" xəbər verir ki, Ümumdünya QİÇS-lə Mübarizə Günü 1988-ci ildə dünya ölkələrinin səhiyyə nazirlərinin sammitindən sonra Ümumdünya Səhiyyə Təşkilatı tərəfindən BMT-nin dəstəyi ilə təsis edilib. Bu günün qeyd olunmasında əsas məqsəd əhalinin diqqətini problemin aktuallığına yönəltmək, xüsusilə də inkişaf etməkdə olan ölkələrdə maarifləndirmə işlərini gücləndirməkdir.
BMT-nin Baş katibi Pan Gi Mun müraciətində dünya üzrə yeni yoluxma hallarının azaldığını, profilaktika və müalicə tədbirlərinin qarşılıqlı əlaqəsinin müsbət nəticə verdiyini vurğulayıb. O həmçinin 2015-ci il üçün müəyyən edilmiş hədəfləri xatırladıb: İİV-in cinsi yolla ötürülməsinin yarıya endirilməsi, uşaqlarda yeni yoluxmaların aradan qaldırılması, 15 milyon yoluxmuş şəxsin müalicə ilə əhatə olunması, stiqma və ayrı-seçkiliyin aradan qaldırılması və maliyyə çatışmazlığının aradan qaldırılması.
Azərbaycanda da QİÇS-lə mübarizə istiqamətində tədbirlər davam etdirilir. İİV-ə yoluxma səviyyəsi aşağı olan ölkələrdən biri kimi Azərbaycan bu sahədə beynəlxalq təcrübədən istifadə edir. Epidemiya əsasən inyeksion narkotik vasitələrdən istifadə edən risk qruplarında müşahidə olunur. 2010-cu ildə Milli Məclis tərəfindən “İİV/QİÇS-in yayılmasının qarşısının alınması haqqında” qanun qəbul edilib və xəstəliyi bilərəkdən yayan şəxslər üçün 3 ildən 7 ilədək həbs cəzası nəzərdə tutulub.
Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən əhalinin maarifləndirilməsi məqsədilə çap materialları hazırlanıb, videoçarxlar nümayiş etdirilib, müraciət edən insanlara məlumat kitabçaları və bukletlər təqdim olunub.
Ümumdünya QİÇS-lə Mübarizə Günü ərəfəsində – 30 noyabrda “Park Bulvar” AVM-də QİÇS-lə Mübarizə Mərkəzinin təşkilatçılığı ilə aksiya keçirilib. İSİM nümayəndələrinin də qatıldığı tədbirdə vətəndaşlara maarifləndirici bukletlər paylanıb. 1 dekabrda isə “Hyatt Regency” mehmanxanasında mətbuat konfransı təşkil olunub. Tədbirdə Səhiyyə Nazirliyinin və İSİM-in rəsmiləri jurnalistlərin suallarını cavablandıraraq QİÇS-lə mübarizə istiqamətində görülən işlər barədə məlumat veriblər.