Dövlət Miqrasiya Xidməti və Beynəlxalq Miqrasiya Təşkilatının Azərbaycan Respublikasındakı Nümayəndəliyi birgə təşkilatçılığı ilə Miqrasiya üzrə Regional Təlim Mərkəzi çərçivəsində həyata keçirilən “Miqrasiya Məktəbi 8” layihəsinə başlanılır və bununla əlaqədar müsabiqə elan edilir.
"Tehsil365" xəbər verir ki, layihədə ali təhsil müəssisələrinin hüquqşünaslıq, politologiya, beynəlxalq münasibətlər, regionşünaslıq, coğrafiyaşünaslıq, tarix, şərqşünaslıq, avropaşünaslıq, amerikaşünaslıq, tərcüməçilik, jurnalistika, turizm, dövlət idarəçiliyi və sosiologiya, dövlət və ictimai münasibətlər, dövlət qulluğunun təşkili və idarə edilməsi sahələri üzrə yuxarı kurs tələbələri və ya magistr pilləsində təhsil alan, həmçinin ali təhsilini yeni bitirmiş gənclər iştirak edə bilərlər.
İştirakçılar layihə çərçivəsində miqrasiya sahəsində peşəkar biliklərə yiyələnəcək, müasir miqrasiya trendləri və beynəlxalq tərəfdaşlarla bağlı məlumat əldə edəcək, Azərbaycanda miqrasiyanın idarə olunması mexanizmi və hüquqi çərçivə ilə bağlı nəzəri və praktiki biliklər qazanacaq, eləcə də Dövlət Miqrasiya Xidmətinin müvafiq struktur bölmələrində təcrübə keçmək imkanı əldə edəcəklər.
Layihədə iştirak etmək istəyən şəxslər aşağıdakı sənədləri təqdim etməlidirlər:
CV
Qeydiyyat forması
İlkin seçimdən keçmiş namizədlər müsahibəyə dəvət olunacaq.
Proqrama sənədlər 9 dekabr 2025-ci il tarixədək elektron poçt vasitəsilə ([email protected]) qəbul olunur.