“Yeniyetmələrin televizor və telefon vasitəsilə izlədiyi proqramlar onların psixologiyasına birbaşa təsir edir.”
Mövzu barədə “Tehsil365”ə açıqlamasında psixoloq Fəridə Musəvi bildirib ki:
“Əlbəttə ki, bizim izlədiyimiz bütün proqramların, mövzuların birbaşa psixologiyamızla əlaqəsi var. Biz romantik bir film izləsək və ya bir klip baxsaq, dərhal onun ab-havasına düşürük. Kriminal bir şey izlədikdə, dərhal onun ssenarisini yaşayırıq, özümüzdə o hissləri canlandırırıq.”
O həmçinin əlavə edib ki:
“Qorxulu qəhrəmanların yer aldığı süjetlər psixologiyamıza mənfi təsir edir. Artıq bizdə müəyyən obsesiyalar yaranır, sinir sistemi rejimdən çıxır, idarəçiliyi itirir və sanki bizi başqaları idarə edir kimi hisslər yaşayırıq.”
Fəridə Musəvi valideynlərə tövsiyə edib ki:
“Valideynlər mütəmadi olaraq çalışmalıdırlar ki, yeniyetmələri nəzarətdə saxlasınlar, üzərlərinə çox getmədən onların telefonlarına nəzarət etsinlər – nə izləyirlər, hansı mövzulara üstünlük verirlər. Yeniyetməlik dövrü mərkəzi sinir sisteminin formalaşmaqda olduğu dövrdür. Bu səbəbdən izlənilən bütün motivli mövzular psixologiyaya daha güclü təsir edir.”