Audiovizual Şura televiziya və radiolardakı reklam çarxlarında əcnəbi sözlərin istifadəsinin qarşısını tamamilə alıb.
"Tehsil365” in məlumatına görə, bunu Şuranın sədri İsmət Səttarov Milli Məclisdə keçirilən "Azərbaycan dilinin dövlət dili kimi inkişaf strategiyası: Mövcud vəziyyət və perspektivlər" adlı konfransda çıxışı zamanı deyib.
Onun sözlərinə görə, əvvəllər reklam çarxlarında tez-tez əcnəbi sözlərə rast gəlinirdi.
İsmət Səttarov həmçinin verilişlərdə vəziyyətin qənaətbəxş olmadığını da bildirib:
"Televiziya və radiolarda 800 saatlıq efirlər olur. Monitorinq şöbəsində də 6 nəfərin olduğunu nəzərə alsaq, bunun hamısını aşkar etmək mümkün olmur. Amma dövlət başçısının çıxışını əsas götürərək süni intellektdən yararlandıq və daha çox istifadə olunan 40-a yaxın əcnəbi sözün siyahısını çıxarıb proqrama daxil etdik. Ümumilikdə aparıcıların iki həftə ərzində 3 minə yaxın əcnəbi söz işlətməsinin şahidi olduq. Bununla bağlı yanvar ayından kanallara xəbərdarlıq göndərəcəyik".