Loqoped-defektoloq Sevinc Hüseynova ilə apardığımız reportajda uşaqlarda kəkələmə probleminin təsirləri və bu pozuntuların aradan qaldırılması yolları müzakirə olunub.
“Tehsil365” xəbər verir ki, Mütəxəssis bildirib ki, kəkələmə nitqin axıcılığının pozulması, ritmik fasilələr və gərginliklə xarakterizə olunur. Bu isə uşağın psixoloji durumuna mənfi təsir göstərir, onu ünsiyyətdən uzaqlaşdırır və özünəqapanmaya səbəb olur.
Problemin həlli üçün loqopedik nəfəs məşqləri, masaj və digər xüsusi metodlar tətbiq edilir. Eyni zamanda, pasiyentin daxili istəyi də müalicə prosesində mühüm rol oynayır.
Sevinc Hüseynova loqopediyanın əsas məqsədinin nitqin normallaşdırılması və aydınlaşdırılması olduğunu qeyd edərək, bu sahənin nitqlə bağlı bütün problemlərin həllinə xidmət etdiyini vurğulayıb.
Uşaqlarla iş prosesində yaranan çətinliklərə toxunan mütəxəssis, dərsə marağı olmayan və valideynə bağlı uşaqlarla işləməyin çətin olduğunu desə də, sevgi və kreativ yanaşmanın bu problemi aşmağa kömək etdiyini bildirib: “Uşaq fərqində olmadan oynayaraq öyrənməlidir və biz bu yolda əzmlə çalışırıq.”
Reportajdan aydın olur ki, loqopedlərin səbrli və peşəkar yanaşması uşaqların nitq bacarıqlarının inkişafında mühüm əhəmiyyət kəsb edir.