“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən müharibəsində qəhrəmancasına şəhid olmuş Novruzov Akşin Şahin oğlunun əziz xatirəsinə həsr edilib.
“Tehsil365” xəbər verir ki, proqramda şəhid Akşin Novruzovun həyat yolu, təhsili, hərbi xidməti və Vətən uğrunda göstərdiyi şücaət geniş şəkildə işıqlandırılacaq.
Qeyd edək ki, Akşin Novruzov 1998-ci il avqustun 15-də Bakı şəhərində anadan olub. Orta təhsilini başa vurduqdan sonra Əmək və Sosial Münasibətlər Akademiyasına daxil olub. Ali təhsilini bitirdikdən dərhal sonra hərbi xidmətə yollanan Akşin Novruzov cəmi 3 ay 3 gün hərbi xidmətdə olmasına baxmayaraq, Vətən qarşısında ən ali və şərəfli zirvəni fəth edib.
O, Daşkəsən–Kəlbəcər istiqamətində yerləşən tabor bölüyündə gedən döyüşlər zamanı qəhrəmancasına şəhid olub. 13 oktyabr 2020-ci il tarixində şəhidlik zirvəsinə ucalan Akşin Novruzov hər oğula nəsib olmayan şərəfli bir taleyə imza atıb.
“Şəhidin səsi” proqramının bu buraxılışı 22 dekabr tarixində, saat 18:00-da yayımlanacaq. Verilişin aparıcısı Valentina Əsgərovadır.
Allah bütün şəhidlərimizə rəhmət eləsin. Onların xatirəsi daim qəlbimizdə yaşayacaq.