Azərbaycan Kinematoqrafçılar İttifaqının katibi, Əməkdar incəsənət xadimi, rejissor Ziya Şıxlinski “Yadıma düşdü” sənədli filminin çəkilişlərini uğurla yekunlaşdırıb.
"Tehsil365" xəbər verir ki, Film Azərbaycanın görkəmli ədəbiyyat nümayəndəsi, Xalq yazıçısı Yusif Səmədoğlunun anadan olmasının 90 illiyi münasibətilə hazırlanıb. Prezident İlham Əliyevin müvafiq sərəncamı ilə ölkəmizdə silsilə tədbirlər təşkil olunaraq, böyük yazıçının irsinə diqqət artırılır.
Ziya Şıxlinski bildirib ki, milli bədii fikir xəzinəsinin zənginləşməsində önəmli rol oynayan Yusif Səmədoğlunun yubileyi ilə əlaqədar öz töhfələrini vermək məqsədi ilə “Yadıma düşdü” sənədli filmini ekranlaşdırıblar. Film yazıçının həyatında əhəmiyyətli yer tutan şəxslərin fikirlərinə əsaslanır. Onların arasında Y.Səmədoğlunun yaxın dostu, Xalq yazıçısı Anar, “Azərbaycan” jurnalının baş redaktoru İntiqam Qasımzadə və yazıçının digər yaxın dostu Qasım müəllim yer alır.
Rejissorun sözlərinə görə, Yusif Səmədoğlu həssas, dərin düşüncəli və özünəməxsus dünyagörüşü ilə seçilən şəxsiyyət idi. O, həm çox kitab oxuyur, həm də yazıçılarla sıx əlaqədə olurdu, lakin eyni zamanda öz fərdi və orijinal baxışını qoruyub saxlayırdı.