BSU-da " Bəxtiyar Vahabzadənin poeziyasının sirri" mövzusunda dəyirmi masa keçirilib
“Tehsil365“ xəbər verir ki,
Dekabrın 26-da Bakı Slavyan Universitetində(BSU) Filologiya fakültəsinin təşkilatçılığı ilə Azərbaycan ədəbiyyatının görkəmli nümayəndəsi, Xalq şairi, dramaturq, ədəbiyyatşünas, pedaqoq və ictimai xadim,Dövlət mükafatları laureatı, akademik Bəxtiyar Vahabzadənin 100 illik yubileyinə həsr olunan " Bəxtiyar Vahabzadənin poeziyasının sirri" mövzusunda dəyirmi masa keçirilib. Tədbir Azərbaycan Respublikasının Prezidenti İlham Əliyevin Bəxtiyar Vahabzadənin 100 illik yubileyinin qeyd edilməsi haqqında müvafiq Sərəncamına uyğun olaraq gerçəkləşib.
Tədbirin moderatoru, Azərbaycan dili kafedrasının müdiri,dosent Şəhla Əhmədova qeyd edib ki,biz bu gün həmişə çoxşaxəli fəaliyyəti ilə xalqımızı layiqincə təmsil edən böyük vətənpərvər şairimiz Bəxtiyar Vahabzadənin işığına toplaşmışıq. Çıxışında vaxtilə Bəxtiyar Vahabzadənin tələbəsi olmaqdan məmnunluq duyduğunu bildirən dosent Ş. Əhmədova gənclərə onun keçdiyi mənalı həyat yolunu, zəngin yaradıcılığını dərindən öyrənməyi tövsiyə edib.
BSU rektorunun məsləhətçisi,professor Ənvər Abbasov mütəfəkkir-şair Bəxtiyar Vahabzadənin yaradıcılığını və ictimai fəaliyyətini yüksək qiymətləndirərək onu həqiqi vətəndaş, əsl ziyalı kimi səciyyələndirib və görkəmli şairin coxcəhətli yaradıcılığının xalqımızın azadlıq ideallarının, milli təfəkkürünün formalaşmasında müstəsna rol oynadığını vurğulayıb.
Tədbirdə Azərbaycan ədəbiyyatı kafedrasının müdiri, professor Rəhilə Qeybullayeva " Bəxtiyar Vahabzadə və " Gülüstan" poeması" mövzusunda, dosent Ş. Əhmədova " Şair Bəxtiyar, müəllim Bəxtiyar ", Azərbaycan ədəbiyyatı kafedrasının dosenti Sədaqət Əsgərova " Bəxtiyar Vahabzadə poeziyasında zaman və insan problemi" mövzusunda çıxış ediblər.
Bədii hissə ilə başa çatan tədbirdə Filologiya fakültəsinin tələbəsi Asim Qasımov şairin " Ana dili " şeirini, həmin fakültənin digər tələbəsi Nəzrin Rüstəmli isə " Vətən marşı" şeirini səsləndiriblər.