Dövlət Məşğulluq Agentliyinin “Məzunların məşğulluq reytinqi” ilə bağlı açıqladığı son məlumata əsasən, ali məktəblər arasında məzunlarının məşğulluğunun orta göstəricilərinə görə Lənkəran Dövlət Universiteti ilk beşlikdə yer alıb.
Bu barədə “Tehsil365"ə LDU-dan məlumat verilib.
Agentlik tərəfindən yayımlanan statistikaya görə LDU məzunlarının 47.5% -i işlə təmin olunub. Xatırladaq ki, agentliyin 2025-ci ilin mayında açıqladığı statistikada LDU 8-ci yerdə idi. Lənkəran Dövlət Universitetinin məzunların məşğulluq üzrə reytinqində region universitetləri arasında birinci yerdə qərarlaşması universitetdə son illərdə bu istiqamətdə aparılan çoxşaxəli işlərin əməli nəticəsi kimi dəyərləndirilməlidir.
Qeyd edək ki, sözügedən statistika Əmək və Əhalinin Sosial Müdafiəsi Nazirliyinin hesabatları əsasında hazırlanıb və universitetlər üzrə məşğulluq reytinqində 35 ali təhsil müəssisəsi yer alıb. Məlumat üçün bildiririk ki, agentliyin açıqladığı məlumatda məzunların əmək bazarına çıxışı və işlə təmin olunma səviyyəsi əsas meyar kimi götürülüb. Məlumatlar 2018- 2023-cü illəri əhatə edir.