Yanvarın 19-da Samux rayonunda 1990-cı il 20 Yanvar faciəsinin ildönümü ilə əlaqədar anım tədbiri təşkil olunub.
"Tehsil365" xəbər verir ki, Tədbir çərçivəsində “Salnamə” film kinostudiyasının istehsalı olan “Silahdaşlar” adlı sənədli film nümayiş etdirilib.
Anım mərasimi Samux Rayon Heydər Əliyev Mərkəzi və Azərbaycan Kinematoqrafçılar İttifaqının birgə təşkilatçılığı ilə baş tutub. Tədbirdə 20 Yanvar faciəsinin tarixi əhəmiyyəti, həmin gün Azərbaycan xalqının göstərdiyi qəhrəmanlıq və müstəqillik uğrunda mübarizəsi barədə çıxışlar səsləndirilib.
Sözügedən sənədli film tədbir iştirakçılarına AKİ-nin katibi, rejissor Tahir Tahiroviç tərəfindən təqdim olunub. O, filmin ərsəyə gəlmə prosesi və ideyası barədə məlumat verərək, “Silahdaşlar”ın 20 Yanvar hadisələrinin yaddaşlarda yaşadılması və gənc nəslə çatdırılması baxımından mühüm əhəmiyyət daşıdığını vurğulayıb.
Qeyd edək ki, “Silahdaşlar” sənədli filmi 20 Yanvar faciəsi zamanı baş verən hadisələri, xalqın birliyini və azadlıq uğrunda mübarizəsini əks etdirir. Film tədbir iştirakçıları tərəfindən maraqla qarşılanıb və dərin emosional təsir yaradıb.