"Tehsil365" İnformasiya Agentliyinin layihəsi olan "Şəhidin səsi" proqramının bu dəfəki buraxılışı Azərbaycanın qəhrəman şəhidlərindən biri, gizir Fariz Şıxəliyevə həsr olunub.
“Tehsil365" xəbərə verir ki, Fariz Şıxəliyev 10 dekabr 1987-ci ildə Rusiya Federasiyasının Xabarovski vilayətində anadan olmuşdur. 1994–2004-cü illərdə Şamaxı rayonunun Qaravəlli kənd tam orta məktəbini bitirmiş, 2006–2008-ci illərdə həqiqi hərbi xidmət keçmişdir. 2009-cu ildə Azərbaycan Tibb Universitetinin hərbi tibb fakültəsinə qəbul olmuş, 2011-ci ildə "ferdşer" ixtisasını bitirərək gizir rütbəsini almışdır.
Xidmətini müxtəlif hərbi hissələrdə davam etdirən Fariz Şıxəliyev 2014-cü ildən Xüsusi Təyinatlı Qüvvələrdə xidmət etmiş, 2016-cı ildə "Aprel" döyüşlərində Talış istiqamətində iştirak etmişdir. Nümunəvi xidmətinə görə bir sıra medallar ilə təltif olunmuşdur.
27 sentyabr 2020-ci ildə başlayan Vətən müharibəsində Fariz Şıxəliyev Cəbrayıl, Füzuli, Qubadlı və Zəngilan rayonlarının azad olunmasında böyük şücaət göstərmişdir. 27 oktyabr 2020-ci il tarixində Xocavənd-Şuşa (Çanaqçı kəndi) istiqamətində gedən döyüşlərdə qəhrəmanlıq göstərərək şəhidlik zirvəsinə yüksəlmişdir. O, döyüşlərdə 2 erməni polkovnikini əsir götürmüş, 11 erməni hərbçisini məhv etmiş və 3 hərbi texnika qənimət götürmüşdür.
Fariz Şıxəliyev ölümündən sonra "Azərbaycan Bayrağı" ordeni, "Vətən uğrunda", "Cəsur döyüşçü", "Cəbrayılın azad olunması", "Füzuli uğrunda", "Xocavənd uğrunda", "Kəlbəcərin azad olunması", "Qubadlının azad olunması", "Vətən müharibəsinin iştirakçısı" və "Şücaətə görə" medalları ilə təltif olunmuşdur. Xidmət dövründə ümumilikdə 12 medal və 11 fəxri fərman almışdır. Ailəli olan şəhidin bir oğlu vardır.
Bu buraxılışın aparıcısı "Tehsil365" İnformasiya Agentliyinin "Könüllü müxbir" layihəsində fəaliyyət göstərmiş və məzun olmuş Şəbnəm Mirzəyevdır. Proqram 2 fevral saat 18:00-da yayımlanacaq.
Şəhidlər ölməz, Vətən bölünməz. Ruhun şad olsun, igidimiz!