Naxçıvan Dövlət Universiteti Batabat Astrofizika Rəsədxanasının məlumatına görə, 28 fevral 2026-cı il tarixində “Planetlərin böyük paradı” adlandırılan astronomik hadisə müşahidə ediləcək.
Bu barədə "Tehsil365"ə Naxçıvan Dövlət Universitetindən məlumat verilib. Bildirilib ki, planetlərin paradı Günəş sistemində bir neçə planetin eyni səma sahəsində görünməsi və bir-birinə yaxın mövqedə yerləşməsi ilə xarakterizə olunur.
Planetlərin paradı təbii olaraq müəyyən dövrlərlə təkrarlanan astronomik hadisədir. Bildirilir ki, fevralın 28-də axşam saatlarında altı planet – Merkuri, Venera, Yupiter, Saturn, Uran və Neptun eyni vaxtda səmada görünəcək.
Həmin gün hava şəraiti əlverişli olarsa, bəzi planetləri teleskopsuz müşahidə etmək mümkün olacaq. Venera (maqnitudası -3.9) Aydan sonra səmadakı ən parlaq cisim kimi seçiləcək. Yupiter (maqnitudası -2.4) də parlaq görünəcək. Saturn (maqnitudası 1.0) və Merkuri (maqnitudası 1.6) isə uyğun şəraitdə adi gözlə müşahidə edilə biləcək.
Uran (maqnitudası 5.8) yalnız binokl vasitəsilə, Neptun (maqnitudası 7.8) isə güclü binokl və ya teleskopla görünəcək.
Məlumata əsasən, Merkuri Günəş batdıqdan qısa müddət sonra qərb üfüqünün aşağı hissəsində görünəcək və onun müşahidə müddəti bir saatdan az olacaq. Venera isə çox parlaq olsa da, üfüqə yaxın yerləşdiyindən açıq və aydın qərb istiqamətində erkən müşahidə tələb edir. Parlaqlığı sayəsində Venera digər planetləri tapmaq üçün əsas istinad nöqtəsi olacaq.
Veneradan bir qədər yuxarıda yerləşən Saturn sabit işıq saçması ilə seçiləcək. Lakin planetlərin Günəşə və üfüqə yaxın mövqedə olması onların müşahidəsini nisbətən çətinləşdirə bilər.
Cənub-şərq istiqamətində isə Yupiter yüksəkdə və parlaq şəkildə görünəcək. Həmin gün Ay da Yupiterə təxminən 4° məsafədə yaxın mövqedə olacaq. Demək olar ki, dolunay fazasında olan Ayın işığı Uran kimi zəif planetlərin müşahidəsini çətinləşdirə bilər.
Qeyd olunur ki, göstərilən məlumatlar 28 fevral 2026-cı il tarixinə aid olub, həvəskar müşahidəçilər üçün istiqamətləndirici xarakter daşıyır. Planetlərin səmadakı mövqeyini daha dəqiq müəyyənləşdirmək üçün astronet.ru və in-the-sky.org saytlarından, eləcə də “Stellarium” və “Sky Map” tətbiqlərindən istifadə etmək tövsiyə olunur.
Mütəxəssislər bildirirlər ki, “Planetlərin paradı” Yerə və canlı aləmə heç bir mənfi təsir göstərmir. Bu hadisə yalnız müşahidə xarakteri daşıyan və gecə səmasını daha da gözəlləşdirən təbii astronomik prosesdir.
